"باسقا الەمدە جۇرگەندەي ەدى": بوكسشىنىڭ اناسى ۇلىنىڭ اۋىر قىلمىسقا قالاي بارعانىن ايتتى

2713
Adyrna.kz Telegram

اسلان مۇقانوۆتىڭ وتباسى بوكسشى تەرىس ءدىني اعىمنىڭ ىقپالىنا ءتۇستى دەپ سانايدى

 قازاقستاننىڭ بىلعارى قولعاپ شەبەرى، بوكستان الەم چەمپيونى اسلان مۇقانوۆ تۋعان جەزدەسىن ءولتىردى دەپ ايىپتالدى.

"كوستانايسكيە نوۆوستي" باسىلىمىنىڭ جازۋىنشا، 11 شىلدەدە كۇدىككە ىلىنگەن بوكسشى قىلمىس ورنىنان سەگىز شاقىرىم قاشىقتىقتا ۇستالدى.

اسلان كىشكەنتايىنان سپورتپەن شۇعىلدانعان. اۋەسقوي بوكستا تاسى ورگە دومالاپ، جوعارى جەتىستىكتەرگە جەتتى، سپورت شەبەرى اتاعىن الدى. ءارى قاراي كاسىپقوي بوكسقا اۋىسقان. قوستاناي كومانداسىنىڭ كومەگىمەن مۇقانوۆ ماياميگە كەتىپ، كاسىبي رينگتە التى جەڭىسكە جەتتى. سودان سوڭ بەلگىلى پروموۋتەر نەلسون لوپەسپەن بىرگە جۇمىس ىستەي باستادى.

مۇقانوۆتىڭ ءىسى

13 شىلدەدە قوستاناي اۋداندىق سوتىندا تەرگەۋ توبى مۇقانوۆتى قاماۋعا الۋدى سۇرادى. جانتۇرشىگەرلىك قىلمىس جاسادى دەپ ايىپتالعان بوكسشى ءمىز باقپاي، جەكپە-جەك الدىندا ءوز-ءوزىن ىشتەي قايراپ وتىرعان ادامداي كورىنگەن.

"مۇقانوۆ پىشەنباەۆتى تەرىس ءومىر سالتى مەن اپكەسىنە كۇن كورسەتپەگەنى ءۇشىن ءولتىرۋدى جوسپارلاعان. ول الدىن الا دايىنداپ قويعان پىشاقتى الىپ، التىن دالا اۋىلىنا جاياۋ بارىپ، تاڭعى ساعات التىدا اپكەسىنىڭ ەسىگىن قاعادى. ەسىكتى پىشەنباەۆ اشادى دا، جاتىن بولمەگە قايتا كىرىپ، جاتىپ قالىپتى. مۇقانوۆ جۋىنىپ، ۇستىنە ۇزىن قوڭىر جەيدەسىن كيگەن", - دەپ تەرگەۋشى بولعان وقيعانى باياندادى.

ساعات 6:40-تا اسلان جەزدەسى ۇيىقتاپ جاتقان بولمەگە كىرىپ، پىشەنباەۆتىڭ موينىنا پىشاق سالادى. ەر ادام ويانىپ، قارسىلىق كورسەتۋگە تىرىسقان. سول كەزدە مۇقانوۆ پىشەنباەۆتىڭ كەۋدەسى مەن قولىنا تاعى بىرنەشە رەت پىشاق سۇعىپتى. پىشەنباەۆ شالقاسىنان جاتىپ، كوز جۇمعان.

ەكس-بوكسشىعا قر قك 99-بابى 2-ءبولىمى 3-تارماعى بويىنشا (قارسىلىق كورسەتۋگە دارمەنسiز ادامدى قاساقانا ءولتىرۋ) ايىپ تاعىلعان. بۇل باپ بويىنشا سوتتالۋشى 15 جىلعا دەيىن باس بوستاندىعىنان ايىرىلۋى مۇمكىن.

سوتتا مۇقانوۆ كىناسىن مويىنداپ، تەرگەۋشىمەن تولىق كەلىستى. "قايدا بارا جاتتىڭىز؟ نەگە ءسىزدى زارەچنىي ماڭىندا ۇستادى؟" دەگەن سۇراققا ول:

"وزەننەن ءجۇزىپ ءوتتىم. تاۋعا شىققىم كەلگەن ەدى، اۋا رايى جاقسى بولدى... سودان سوڭ اتا-انام قوڭىراۋ شالدى... سوڭىمنان كەلە جاتقانىن سەزىپ، پوليتسيانى كۇتتىم", - دەپ جاۋاپ بەردى.

سوت اسلاندى ەكى ايعا قاماۋعا الۋعا شەشىم قابىلدادى.

اسلان مۇقانوۆقا نە بولدى؟

اناسى زاۋرە تولەبايقىزى الەۋمەتتىك جەلىلەردەگى ءتۇرلى قاۋەسەتتەردەن شارشاپ، بولعان وقيعانىڭ انىق-قانىعىن ايتىپ بەرۋگە كەلىسىپتى.

"سەكا (سەرىك پىشەنباەۆ – Sputnik) قىزىمدى الاقانىنا سالىپ، ايالاپ ۇستادى، وتباسىمىزعا دەگەن كوڭىلى دە ەرەكشە ەدى. كۇن كورسەتپەدى دەگەن نە ءسوز؟ جاقسى كورەتىن، قوناققا بارعانىمىزدا بارىمىزگە جاقسىلىق تىلەدى. اسلان ەكەۋى اعايىندى سياقتى ەدى... اسلان كولۋمبيادا جۇرگەندە، اقشا جىبەرىپ كومەكتەستى، بۇل جايلى ەشكىمگە ءتىس جارىپ ايتپاعان بولاتىن", - دەيدى ايەل كوزىنە جاس الىپ.

قايعىدان قان جۇتىپ وتىرعان انانىڭ ايتۋىنشا، اسلانعا بىرەۋلەر ىقپال ەتكەن.

"سوڭعى كەزدەرى باسقا الەمدە جۇرگەندەي ەدى. نە ويلاعانىن بىلسەم، ۇيگە بايلاپ قويار ەدىم", - دەيدى ول زار ەڭىرەپ.

ايەل ادامنىڭ سوزىنە سۇيەنسەك، شەتەلدە اسلانعا دەسترۋكتيۆتى ءدىني اعىم وكىلدەرى ىقپال ەتىپتى. كولۋمبيادا تۇرمىسى تومەندەپ، ابدەن قينالعان ول قازاقستانعا ورالعىسى كەلەدى.

ءسويتىپ، بيىل 26 ماۋسىمدا اسلان ۇيىنە ورالادى. اتا-اناسىنا ءوز ءىسىن باستاعىسى كەلەتىنىن ايتىپ، دوستارىمەن سويلەسىپ ءجۇرىپتى. الايدا اناسى ۇلىنىڭ وزگەرگەنىن سول كەزدە سەزگەن ەكەن.

"كۇلمەيتىنىن بىردەن بايقادىم. سويلەسۋگە تەلەفون الىپ بەرگەنبىز. كۇنى بويى شۇقىلاپ، وزىمەن-ءوزى، بولەك الەمدە وتىراتىن، - دەيدى زاۋرە تولەبايقىزى. – ءبىر جولى ماعان: "ماما، بىلەسىڭ بە، ادام ءومىرى وسىنداي قىسقا" – دەپ موينىن ساۋساعىمەن كەسكەندەي ەتىپ كورسەتتى. ول كەزدە نەنى مەڭزەگەنىن ەشقايسىمىز تۇسىنبەپپىز".

تۋعان-تۋىستارى جىگىتتىڭ بۇل كۇيىنە قاراپ، باسىنا تۇسكەن اۋىرتپالىقتان كۇيزەلىسكە ۇشىراعان عوي دەپ ويلاعان.

ەستەرىڭىزگە سالا كەتسەك، 12 شىلدەدە قوستاناي وبلىسىندا بوكستان قازاقستان چەمپيونى اسلان مۇقانوۆ ادام ءولتىردى دەگەن كۇدىكپەن ۇستالعانى بەلگىلى بولدى. وبلىستاعى پوليتسيا دەپارتامەنتىنىڭ اقپاراتىنا سايكەس، 11 شىلدە كۇنى 32 جاستاعى تۇرعىننىڭ دەنەسى تابىلعان. بۇل تۋرالى پوليتسياعا قايتىس بولعان ادامنىڭ ايەلى حابارلاپتى.

Sputnik

پىكىرلەر