بيىل 25 مامىردا قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆتىڭ تۋعانىنا 100 جىل تولدى. اتالمىش داتاعا وراي الماتىدا ەسكە الۋ شاراسى ءوتتى، دەپ حابارلايدى “ادىرنا” ۇلتتىق پورتالى.
ءىس-شارا الماتى قالاسىنداعى ساعادات نۇرماعامبەتوۆ تۇرعان جانە ەڭبەك جولىن وتكىزگەن ءۇيدىڭ الدىنداعى ەسكەرتكىش تاقتا ماڭىندا ءوتتى.
ەسكە الۋ شاراسىندا بەلگىلى اسكەري قايراتكەرلەر، شەندى اسكەريلەر توبە كورسەتتى. ولاردىڭ قاتارىندا ساكەن جاسۇزاقوۆ، ماحمۇت تەلەعۇسوۆ، سابيت تاۋلانوۆ بولدى.
ساعادات نۇرماعامبەتوۆتىڭ شاكىرتتەرى جانە سول كىسىنىڭ ءىزىن باسقان اسكەري ماماندار ءسوز سويلەپ، ەرلىك ىستەرىن ەسكە الدى.
ساعادات قوجاحمەتۇلى نۇرماعانبەتوۆ – اسكەري قايراتكەر، ارميا گەنەرالى، كەڭەس وداعىنىڭ باتىرى، قازاقستان رەسپۋبليكاسىنىڭ تۇڭعىش قورعانىس ءمينيسترى، «حالىق قاھارمانى»، الماتى، استانا، دونەتسك (ۋكراينا) قالالارىنىڭ، اقمولا وبلىسىنىڭ، اقكول اۋدانىنىڭ قۇرمەتتى ازاماتى.
