شيەلىدە مەكتەپ وقۋشىلارى اراسىنداعى توبەلەس سوڭى ولىممەن اياقتالعان بولاتىن. جاعدايعا قاتىستى مينيستر تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
قىزىلوردا وبلىسىندا 10-سىنىپ وقۋشىلارى 9-سىنىپ وقۋشىسىنا الىمجەتتىك كورسەتىپ، ۇرىپ ولتىرگەن بولاتىن. قايعىلى وقيعادان كەيىن مەكتەپتەگى الىمجەتتىككە قاتىستى مۇعالىمدەر مەن پوليتسەيلەر قىلمىستىق كودەكستىڭ نورمالارىن ايتىپ، ءتۇسىندىرۋ جۇمىسىن جۇرگىزىپ جاتىر.
جۋرناليست وقۋ-اعارتۋ مينيسترىنە «جاقىندا جامبىل وبلىسىندا مەكتەپتە وقۋشى بالانى ۇرىپ، سالدارىنان ول كوز جۇمدى. سونداي-اق كەشە قىزىلوردا وبلىسىندا 10-سىنىپ وقۋشىلارى 9-سىنىپتىڭ وقۋشىلارىن ۇرىپ، ءبىر بالا قايتىس بولدى. وسى جاعدايدى ءسىز باقىلاۋعا الدىڭىز با؟ وسىنداي قايعىلى جاعداي بولماس ءۇشىن 8-11 سىنىپ وقۋشىلارىنا قىلمىستىق كودەكستىڭ نورمالارىن ءتۇسىندىرۋ كەرەك شىعار؟ سەبەبى، بيىل مەكتەپتەردە الىمجەتتىك جيىلەپ كەتكەن سياقتى» دەگەن سۇراق قويدى.
عاني بەيسەمباەۆ بۇل ماسەلە بويىنشا بارلىق وڭىردەگى اكىمنىڭ ورىنباسارلارىن جيناپ، شۇعىل جينالىس وتكىزگەنىن اتاپ ءوتتى.
ء"بىز بارلىق ماسەلەنى اشىق تالقىلاپ، وڭىردەگى اكىمدىكتەرگە ناقتى تاپسىرما بەرىلدى. بىلتىر تامىزدىڭ سوڭىندا وقۋ-اعارتۋ مينيسترلىگى تاراپىنان بالالاردىڭ قۇقىعىن قورعاۋ ءۇشىن كەشەندى باعدارلاما ۇكىمەتتىڭ قاۋلاسىمەن قابىلداندى. وسىعان بايلانىستى الەمدەگى تاجىريبەنى زەرتتەپ، بۋللينگكە قارسى ەڭ ءتيىمدى رەتىندە جوبا فيندىك جۇيەنى جانە "دوس بولايىق" جوباسىن قاراستىردىق", - دەدى مينيستر.
ال قىزىلورداداعى قايعىلى وقيعاعا قاتىستى ءمان-جايدى انىقتاعانىن اتاپ ءوتتى.
"كەشە بىردەن اكىمنىڭ ورىنباسارىنا تىكەلەي تەلەفون ارقىلى حابارلاسىپ، بولعان جاعدايعا قاتىستى قانداي شارانىڭ قولدانىپ جاتقانىن سۇرادىم. تەك ءبىر مەكتەپكە قاتىستى ەمەس، ايماقتاعى (باسقا مەكتەپتەرگە) ناقتى قانداي شارالار قولدانىلاتىنى تۋرالى ءبىز جارتى ساعاتتاي اڭگىمەلەستىك. مۇنداي جۇمىستار پاۆلودار جانە جامبىل وبلىسىنداعى اكىمدىكتەرمەنەن دە ارنايى كەشەندى جوسپار قۇرۋ باعىتىندا جۇمىستار قولعا الىنىپ جاتىر...", - دەدى ۆەدومستۆو باسشىسى.
مينيستر مەكتەپتەگى الىمجەتتىككە قاتىستى وقۋشىلاردىڭ بارىنە تۇسىندىرمە جۇمىستارى جۇرگىزىلەتىنىن دە تىلگە تيەك ەتتى.
"بيىلدان باستاپ ادىلەت مينيسترلىگى، ىشكى ىستەر مينيسترلىگىنىڭ ماماندارى وسى قۇقىقتىق زاڭداردى دۇرىس پايدالانۋعا، ساۋاتتاندىرۋعا قاتىستى جۇمىستى باستاپ كەتتى. بۇدان بولەك، بارلىق مەكتەپتە 111 سەنىم تەلەفونى جۇمىس ىستەيدى. وعان كەز كەلگەن بالا حابارلاسا الادى. ولار وسىنداي جاعدايدى ايتىپ، ءتيىستى شاعىمىن جاساي الادى", - دەدى عاني بەيسەمباەۆ.
