قازاقستان مەن جاپونيا سۋ تاسقىنىمەن ءتيىمدى كۇرەسۋ ءۇشىن گيدروتەحنيكالىق قۇرىلىستاردى نىعايتۋ بويىنشا بىرلەسىپ جۇمىس جۇرگىزۋدى جوسپارلاپ وتىر. ىنتىماقتاستىق وسى جىلدىڭ ماۋسىم ايىندا باستالۋى مۇمكىن، دەپ حابارلايدى «ادىرنا» ءتىلشىسى.
18 مامىردا سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز جاپونيانىڭ قازاقستانداعى ەلشىلىگىنىڭ وكىلى كاناتا توموحيرومەن كەزدەسۋ بارىسىندا ىنتىماقتاستىق مۇمكىندىكتەرىن تالقىلادى.
قازىرگى ۋاقىتتا جاپونيا تارابى ەكى باعىتتا كومەك كورسەتۋ مۇمكىندىگىن قاراستىرىپ وتىر. ءبىرىنشىسى - جاپونيانىڭ جەر، ينفراقۇرىلىم، كولىك جانە تۋريزم مينيسترلىگىمەن بىرلەسىپ جۇمىس جاساۋ. ەكىنشى باعىت – جاپوندىق حالىقارالىق ىنتىماقتاستىق اگەنتتىگىمەن (JICA) ءوزارا سەرىكتەستىك ورناتۋ. سونىمەن قاتار، JICA وسى جىلدىڭ ماۋسىم ايىندا تەحنيكالىق قولداۋ كورسەتۋگە دايىن.
«قازاقستان تاراپىنان سۇرانىسقا جەدەل جاۋاپ بەرگەن جاپوندىق ارىپتەستەرىمىزگە العىس ايتامىن. ءبىز جۇمىستى باستاپ كەتۋ ءۇشىن بارلىق قاجەتتى دەرەكتەردى بەرۋگە دايىنبىز. قازىر ءبىزدىڭ ساراپشىلار نىساندارعا باستاپقى تەكسەرۋ جۇمىسىن جۇرگىزىپ جاتىر. زاماناۋي جاپوندىق تەحنولوگيالار قاجەتتى جۇمىس كولەمىن ءدال انىقتاۋعا مۇمكىندىك بەرەدى»،- دەدى سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز.
ءوز كەزەگىندە جاپونيا تارابى قىسقا مەرزىمدە نىعايتىلۋى ءتيىس ماڭىزدى قۇرىلىمداردىڭ ءتىزىمىن سۇرادى. دەرەكتەر JICA وكىلدەرىنە بەرىلەدى.
