رەسەي پرەزيدەنتى ۆلاديمير پۋتين قايتا پرەزيدەنتتىككە سايلانعاننان كەيىن قىتاي حالىق رەسپۋبليكاسىنىڭ استاناسى بەيجىڭگە ەكى كۇندىك مەملەكەتتىك ساپارمەن باردى. قىتايدا 16-17 مامىر ارالىعىندا جۇمىس كەزدەسۋلەرىن وتكىزبەك، دەپ حابارلايدى “ادىرنا” ۇلتتىق پورتالى.
قىتاي سىرتقى ىستەر مينيسترلىگىنىڭ رەسمي وكىلى ۆان ۆەنبين ساپار بارىسىندا قحر توراعاسى سي تسزينپين پرەزيدەنت پۋتينمەن قىتاي مەن رەسەي اراسىنداعى ديپلوماتيالىق قارىم-قاتىناستاردىڭ ورناتىلعانىنا 75 جىل تولۋى اياسىنداعى ەكىجاقتى قارىم-قاتىناس ماسەلەلەرى، ءتۇرلى سالالارداعى ىنتىماقتاستىق، سونداي-اق ءوزارا مۇددەنى قوزعايتىن حالىقارالىق جانە ايماقتىق ماسەلەلەر بويىنشا پىكىر الماساتىنىن مالىمدەدى.
تاسس اگەنتتىگىنىڭ حابارلاۋىنشا، رەسەي پرەزيدەنتى بەيجىڭ مەن حاربينگە بارادى. قىتاي استاناسىندا رەسەي فەدەراتسياسى مەن قىتاي حالىق رەسپۋبليكاسى باسشىلارىنىڭ كەلىسسوزدەرى تار جانە كەڭەيتىلگەن قۇرامدا وتەدى. رەسەي دەلەگاتسياسىنىڭ قۇرامىندا بەس ۆيتسە-پرەمەر، ەكونوميكا، ديپلوماتيالىق جانە قاۋىپسىزدىك ۆەدومستۆولارىنىڭ باسشىلارى، رەسەي تەمىر جولدارى، روساتوم جانە روسكوسموس باسشىلارى، سونداي-اق رەسەيدىڭ 20 ايماعىنىڭ باسشىلىعى بار.
حاربين قالاسىندا (حەيلۋنتسزيان پروۆينتسياسىنىڭ اكىمشىلىك ورتالىعى) پۋتين VIII «قىتاي-رەسەي» ەكسپو كورمەسىنىڭ اشىلۋ سالتاناتىنا جانە ايماقارالىق ىنتىماقتاستىق جونىندەگى IV رەسەي-قىتاي فورۋمىنا قاتىسادى.
