اقمولا وبلىسىندا سۋ تاسقىنىنان زارداپ شەككەن تۇرعىنداردى تۇرعىن ۇيمەن قامتاماسىز ەتۋ جۇمىستارى جالعاسۋدا.
بۇگىندە اتباسار اۋدانىنان 27 وتباسى جانە كوكشەتاۋ قالاسىنان 13 وتباسى باسپانالى بولدى.
پاتەر كىلتىن اقمولا وبلىسىنىڭ اكىمى مارات احمەتجانوۆ سالتاناتتى تۇردە تابىس ەتتى.
ءوڭىر باسشىسى جاڭا قونىستانۋشىلاردى قۋانىشتارىمەن قۇتتىقتاپ، شاڭىراقتارىنا جىلۋلىق پەن جايلىلىق تىلەدى.
«ەل پرەزيدەنتى اپاتتان زارداپ شەككەن ادامدارعا قامقورلىق جاساۋدى ءبىرىنشى كەزەكتەگى مىندەت دەپ انىقتادى. بۇگىن دە مەملەكەت باسشىسىنىڭ تاپسىرماسىن ورىنداۋ اياسىندا ۇيلەرى تابيعي اپاتتان زارداپ شەككەن جانە تۇرعىن ۇيگە جارامسىز بولعان ازاماتتارعا پاتەر كىلتتەرىن تابىستاۋدى جالعاستىرۋدامىز. بۇدان باسقا، ءبىز زالالدى وتەۋ، بىرجولعى كومەك تولەۋ جانە ت.ب. بويىنشا بارلىق شارالاردى قابىلداپ جاتىرمىز. ۇيلەردى، بۇلىنگەن ينفراقۇرىلىمدى قالپىنا كەلتىرۋ بويىنشا ۇلكەن جۇمىس كۇتىپ تۇر»، - دەپ اتاپ ءوتتى م.احمەتجانوۆ.
باسپانالى بولعانداردىڭ اراسىندا بوريسوۆكا اۋىلىنىڭ تۇرعىنى ناتاليا زايكا بار. كوپ بالالى انا جاڭا ءۇيدى سۋ باسپايتىن اۋماقتان ءوزى تاڭدادى.
«توتەنشە جاعدايدان كەيىنگى العاشقى كۇندەرى ءبىز بارلىق مەملەكەتتىك ورگانداردىڭ كومەگى مەن قامقورلىعىن سەزىندىك. پرەزيدەنت قاسىم - جومارت توقاەۆقا زارداپ شەككەندەر بويىنشا جەدەل شەشىم قابىلداعانى ءۇشىن العىسىمدى بىلدىرگىم كەلەدى»، - دەدى ن. زايكا.
كوكشەتاۋدا سۋ تاسقىنىنان زارداپ شەككەن 13 وتباسى پاتەرلى بولدى.
ەستەرىڭىزگە سالا كەتەيىك، بۇدان بۇرىن وبلىس ورتالىعىنىڭ 14 تۇرعىنىنا پاتەر كىلتى بەرىلگەن ەدى.
«سۋ كىرگەن ءۇيىمىز جارامسىز بولىپ قالدى. ءبىز كوپ كۇتكەن جوقپىز. جاڭا پاتەرگە كوڭىلىمىز تولادى. ءبىز ءوزىمىز تاڭداعان پاتەرگە قول جەتكىزدىك»، - دەپ قۋانىشىمەن ءبولىستى ەكى بولمەلى پاتەردىڭ يەسى كۇلشارا شاحيزاداەۆا.
«ءبىز كۇزگە دەيىن ينفراقۇرىلىمدى قالپىنا كەلتىرۋ بويىنشا بارلىق جۇمىستاردى اياقتاپ، ايماقتاعى بارلىق زارداپ شەككەندەردى تۇرعىن ۇيمەن قامتاماسىز ەتۋدى جوسپارلاپ وتىرمىز»، - دەپ قورىتىندىلادى وبلىس اكىمى.
ايتا كەتەيىك، وبلىستا 1500-دەن استام اقمولالىق بىرجولعى تولەم الدى. مۇلىكتى باعالاۋ جۇمىستارى اياقتالۋدا.
