Aqmola oblysynda sý tasqynynan zardap shekken turǵyndardy turǵyn úımen qamtamasyz etý jumystary jalǵasýda.
Búginde Atbasar aýdanynan 27 otbasy jáne Kókshetaý qalasynan 13 otbasy baspanaly boldy.
Páter kiltin Aqmola oblysynyń ákimi Marat Ahmetjanov saltanatty túrde tabys etti.
Óńir basshysy jańa qonystanýshylardy qýanyshtarymen quttyqtap, shańyraqtaryna jylýlyq pen jaılylyq tiledi.
«El Prezıdenti apattan zardap shekken adamdarǵa qamqorlyq jasaýdy birinshi kezektegi mindet dep anyqtady. Búgin de Memleket basshysynyń tapsyrmasyn oryndaý aıasynda úıleri tabıǵı apattan zardap shekken jáne turǵyn úıge jaramsyz bolǵan azamattarǵa páter kiltterin tabystaýdy jalǵastyrýdamyz. Budan basqa, biz zalaldy óteý, birjolǵy kómek tóleý jáne t.b. boıynsha barlyq sharalardy qabyldap jatyrmyz. Úılerdi, búlingen ınfraqurylymdy qalpyna keltirý boıynsha úlken jumys kútip tur», - dep atap ótti M.Ahmetjanov.
Baspanaly bolǵandardyń arasynda Borısovka aýylynyń turǵyny Natalıa Zaıka bar. Kóp balaly ana jańa úıdi sý baspaıtyn aýmaqtan ózi tańdady.
«Tótenshe jaǵdaıdan keıingi alǵashqy kúnderi biz barlyq memlekettik organdardyń kómegi men qamqorlyǵyn sezindik. Prezıdent Qasym - Jomart Toqaevqa zardap shekkender boıynsha jedel sheshim qabyldaǵany úshin alǵysymdy bildirgim keledi», - dedi N. Zaıka.
Kókshetaýda sý tasqynynan zardap shekken 13 otbasy páterli boldy.
Esterińizge sala keteıik, budan buryn oblys ortalyǵynyń 14 turǵynyna páter kilti berilgen edi.
«Sý kirgen úıimiz jaramsyz bolyp qaldy. Biz kóp kútken joqpyz. Jańa páterge kóńilimiz tolady. Biz ózimiz tańdaǵan páterge qol jetkizdik», - dep qýanyshymen bólisti eki bólmeli páterdiń ıesi Kúlshara Shahızadaeva.
«Biz kúzge deıin ınfraqurylymdy qalpyna keltirý boıynsha barlyq jumystardy aıaqtap, aımaqtaǵy barlyq zardap shekkenderdi turǵyn úımen qamtamasyz etýdi josparlap otyrmyz», - dep qorytyndylady oblys ákimi.
Aıta keteıik, oblysta 1500-den astam aqmolalyq birjolǵy tólem aldy. Múlikti baǵalaý jumystary aıaqtalýda.