الماتى وبلىسىندا جانتۇرشىگەرلىك جول اپاتى بولدى، دەپ حابارلايدى "ادىرنا" ۇلتتىق پورتالى.
ىلە اۋدانىندا پوليتسيا قىزمەتكەرلەرىنەن قاشقان جۇرگىزۋشى قاتتى جىلدامدىقپەن ايالداماعا كىرىپ كەتكەن. سالدارىنان ەكى ادام قازا بولىپ، ءۇش ادام اۋرۋحاناعا جەتكىزىلدى.
قايعىلى وقيعا 12 مامىرعا قاراعان ءتۇنى بولدى.
"12 مامىرعا قاراعان ءتۇنى "بۇركىت-35" بريگاداسىنىڭ پوليتسەيلەرى بايسەركە اۋىلىندا پاترۋلدەۋ كەزىندە زيل-131 كولىگىنە كۇدىتەنگەن. جۇرگىزۋشى پوليتسيا قىزمەتكەرلەرىنىڭ توقتاۋ تۋرالى ءوتىنىشىن ەلەمەي، قاشىپ كەتپەك بولعان. سالدارىنان جۇك كولىگىن باسقارعان 49 جاستاعى ەر ادام الماتى-جەتىگەن تاس جولىنىڭ 32-ءشى شاقىرىمىنداعى ايالداماعا قاتتى جىلدامدىقپەن كىرىپ كەتكەن. وقيعا سالدارىنان ەكى ادام قازا تاۋىپ، ۇشەۋى ءتۇرلى دەنە جاراقاتتارىمەن اۋداندىق اۋرۋحاناعا جاتقىزىلدى", – دەدى الماتى وبلىسى جول پوليتسياسى باسقارماسىنىڭ باستىعى باۋىرجان الەنوۆ.
مەديتسينالىق كۋالاندىرۋ قورىتىندىسىنا بويىنشا جۇرگىزۋشى كولىكتى ورتاشا دارەجەدەگى ماس كۇيىندە باسقارعانى انىقتالعان. قازىر جۇرگىزۋشىنىڭ ۇستىنەن ەكى ادامنىڭ ولىمىنە اكەپ سوقتىرعان جول-كولىك وقيعاسى بويىنشا قىلمىستىق ءىس قوزعالدى.
