7 ادام قازا تاپقان سانكت-پەتەربۋرگتەگى اۆتوبۋس اپاتىندا قازاقستان ازاماتى دا سۋ استىندا قالعان جولاۋشىلارعا قول ۇشىن سوزعانى بەلگىلى بولدى، دەپ حابارلايدى “ادىرنا” ۇلتتىق پورتالى.
ول شاحتينسك قالاسىنىڭ تۋماسى، قازىر سانكت-پەتەربۋرگ قالاسىنىڭ تۇرعىنى ەرحان احانوۆ. قازاقستاندىق جىگىت العاشقى بولىپ جولاۋشىلاردى قۇتقارۋعا ات سالىسقان.
ەرحان كولىگىنە جۇگىرىپ بارىپ، جۇكسالعىشتان كابەلدى الىپ، قورشاۋعا بايلاعانىن ايتتى. وعان الدىمەن تاعى ءبىر كۋاگەر بولىسقان، ودان كەيىن ەرحان ءوزى دە كومەككە تۇسكەن.
«جىگىتتەر ليۋكتى اشىپ، ايەلدى شىعارا باستادى، مەن وعان العاشقى كومەك كورسەتۋ ءۇشىن جۇرەگىنە ماسساج جاساي باستادىم، ول اۋزىن اشىپ، سۋعا تۇنشىعىپ قالدى، مەن ونى بۇيىرىنە جاتقىزىپ، قايتادان جۇرەك ماسساجىن جاساي باستادىم. جىگىتتەردىڭ ءبىرى كومەكتەسىپ، جاساندى تىنىس الۋدى باستادى»، - دەدى ول جەرگىلىكتى «فونتانكا» باسىلىمىنا.
ەرحان ءوزىنىڭ بۇل ارەكەتىن ەرلىك دەپ سانامايدى. ونىڭ ويىنشا، ونىڭ ورنىندا كىم بولسا دا سولاي ىستەر ەدى.
ەستەرىڭىزگە سالا كەتەيىك، بۇعان دەيىن سانكت-پەتەربۋرگتە جولاۋشىلار مىنگەن اۆتوبۋس جول اپاتىنا ۇشىراپ، مويكا وزەنىنە 20 اداممەن بىرگە قۇلاپ كەتكەنى جايلى حابارلاعان ەدىك.
