ۇلى وتان سوعىسىنداعى جەڭىس كۇنىنە ارنالعان مەرەكەلىك شارا اقمولا وبلىسىنىڭ اكىمى مارات احمەتجانوۆتىڭ قاتىسۋىمەن كوكشەتاۋ قالاسىنداعى كەڭەس وداعىنىڭ باتىرى مالىك عابدۋلليننىڭ ەسكەرتكىشىنە جانە كەڭەس وداعىنىڭ ەكى مارتە باتىرى تالعات بيگەلدينوۆتىڭ بيۋستىنە گۇل شوقتارىن قويۋ راسىمىمەن باستالدى.
بيىلعى جىلى جەڭىس كۇنىنە ارنالعان ءىس-شارالار رەيحستاگقا جەڭىس تۋىن تىككەن قازاق، حالىق قاھارمانى راحىمجان قوشقارباەۆتىڭ 100 جىلدىعىن جانە كەڭەس وداعىنىڭ باتىرى، حالىق قاھارمانى جانە تاۋەلسىز قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆتىڭ تۋعانىنا 100 جىلدىعى اياسىندا اتالىپ وتىلۋدە.
ءوڭىر باسشىسى قۇرمەتتى قاراۋىلدىڭ جانە ۇرمەلى اسپاپتار وركەستىرىنىڭ سۇيەمەلدەۋىمەن گۇل شوقتارىن قويىپ، قان مايداندا شەيىت بولعان ارداگەرلەردى ءبىر مينۋت ۇنسىزدىكپەن ەسكە الدى.
ودان ءارى وبلىس باسشىسى باستاعان شەرۋ داڭق اللەياسىمەن ماڭگىلىك الاۋعا قاراي ءجۇرىپ ءوتتى.
«مەملەكەت باسشىسى قاسىم-جومارت توقاەۆ «جەڭىس كۇنى – حالقىمىزدىڭ ەرەن ەرلىگى مەن بىرلىگىنىڭ، قاھارماندىعىنىڭ سيمۆولى بولىپ سانالادى» دەپ ايتقان بولاتىن. بابالارىمىزدىڭ باعا جەتپەس باتىرلىعىنىڭ ارقاسىندا – ءبىز بۇگىن بەيبىت ەلدە، باقىتتى ءومىر ءسۇرىپ جاتىرمىز. بۇگىن سول قاسىرەتتى سوعىس جىلدارىندا قازا تاپقانداردىڭ، بارلىق مايدانداردا حابارسىز كەتكەندەردىڭ، وسى كۇنگە جەتە الماعان بابالار ەسىمىن ەسكە الىپ، ۇرپاق پارىزىن ورىنداۋعا جينالىپ وتىرمىز. جەڭىسكە جەتىپ، سوعىستان كەيىن كۇيزەلگەن ەلدى كوتەرۋگە ات سالىسقان، وسى شۋاقتى كۇندەرگە جەتپەگەن ازاماتتاردىڭ جارقىن بەينەلەرىن قۇرمەتپەن ەسكە الىپ، باس يەمىز»، - دەدى سالتاناتتى شارادا ءسوز سويلەگەن مارات احمەتجانوۆ.
ءوڭىر باسشىسى اتاپ وتكەندەي، اقمولا وبلىسىنان 90 مىڭ ادام مايدانعا اتتانىپ، ونىڭ 37 مىڭنان استامى ورالعان. اقمولالىقتار بارلىق مايدانداردا سوعىسىپ، ماسكەۋ، ستالينگراد، كۋرسك دوعاسىنداعى شايقاستارعا قاتىستى. ونىڭ ىشىندە 66 اقمولالىق كەڭەس وداعىنىڭ باتىرى جانە داڭق وردەنىنىڭ تولىق كاۆالەرلەرى بولدى. قازىرگى تاڭدا وڭىردە 5 سوعىس ارداگەرى جانە 5 مىڭعا جۋىق تىل ەڭبەككەرى تۇرادى.
ايتا كەتەيىك، جەڭىس كۇنىنە ارنالعان مەرەكەلىك كونتسەرت «تاۋەلسىزدىك» الاڭىندا ۇيىمداستىرىلدى. مەرەكە اياسىندا وڭىردە ءتۇرلى فورماتتاعى 800-گە جۋىق ءىس-شارا وتكىزىلدى.