جالعىزباستى انا ەكى بالاسىن شىمكەنت قالاسى اباي اۋدانى اكىمدىگىنە تاستاپ كەتتى. Sputnik قازاقستان تىلشىسىنە سۇحبات بەرگەن اكىم ورىنباسارى نۇرلان تىلەش وقيعانىڭ ءمان-جايىن ءتۇسىندىرىپ بەردى.
"بۇل وقيعا وتكەن اپتادا جۇما كۇنى بولعان. تۇسكى اسقا شىعىپ بارا جاتقانىمدا ول كەلىنشەك تومەندە قابىلداۋدا وتىردى. قولىندا ەمىزۋلى نارەستەسى، قاسىندا تاعى ەكى كىشكەنتاي بالاسى بولدى. 5-6 جاسار بالالار-اۋ دەيمىن. جالپى، ءتورت بالا-شاعاسى بار ەكەن. مەن ودان نەعىپ تۇرسىز دەپ سۇراعانمىن. ول پاتەر جالداپ تۇراتىنىن جانە وعان قارىز ەكەنىن جەتكىزدى", - دەيدى تىلەش.
اباي اۋدانى اكىمى ورىنباسارىنىڭ ايتۋىنشا، كەلىنشەك الەۋمەتتىك كومەككە بالالاردىڭ قۇجاتتارىن وتكىزگەنىن ايتىپ، سونىڭ ەكىنشى توقسانىن تەزىرەك وتكىزىپ بەرۋىن وتىنگەن.
نۇرلان تىلەشتىڭ ءوزى كوممۋنالدىق ماسەلەلەرگە جاۋاپ بەرەدى. بىراق الەۋمەتتىك بولىمگە وتكىزىپ، سول جەردەگى مامانداردان جالعىزباستى انانىڭ قۇجاتتارىن قاراپ شىعۋىن سۇراعان.
"ول كىسىدەن اتاۋلى الەۋمەتتىك كومەك اياسىندا بالالاردىڭ 21 مىڭ تەڭگەسىن الدىڭىز با دەپ سۇراپ ەدىم، الدىم دەدى. ءبىرىنشى توقساندا ءبىر رەت 150 مىڭ الدىم، ءبىر رەت 170 مىڭ الدىم دەدى. دۇرىس، بوپتى دەدىم. سودان كەلەسى توقساننىڭ اقشاسىن تەزىرەك ءتۇسىرىپ بەرسەڭىز دەپ سۇرادى. مەن قىزدارعا تاپسىردىم دا، تۇسكى اسقا كەتىپ قالدىم", - دەپ اتاپ كورسەتتى تىلەش.
اكىمنىڭ ورىنباسارى ۇيدە وتىرعاندا الەۋمەتتىك ءبولىمنىڭ قىزدارى قوڭىراۋ شالىپ، جالعىزباستى انانىڭ ەكى بالاسىن تاستاپ كەتىپ قالعانىن جەتكىزەدى. ماماندار "102-گە" حابار بەرگەن. ال نۇرلان تىلەش جۇمىسقا بارعانشا پروكۋراتۋرا مەن ىشكى ىستەر ورگاندارىنىڭ قىزمەتكەرلەرى كەلىپ، ماسەلەنىڭ ءمان-جايىن انىقتاۋعا كىرىسكەن.
"ساعات ەكى جارىمنىڭ كەزىندە اناسى ءوزى كەلگەنىن ايتتى. استىنا تۇسسەم، شىنىمەن دە، ول كىسى كەلىپتى. جاعدايىن سۇراسام، 30 مىڭ تەڭگەگە پاتەر جالدايمىن، جارتىسىن تولەپ، جارتىسىن تولەي الماي جاتىرمىن دەدى. ءبىز ول ماسەلەنى شەشىپ بەرەتىنىمىزدى ايتتىم. باسقا ماسەلە بار ما دەسەم، ازىق-تۇلىك جاعىنان جاردەم سۇرادى. وعان دا كەلىستىك. ءسويتىپ تۇرعاندا ول ايەل وزىنەن-ءوزى كوتەرىلىپ، ماعان اقشا دا، ازىق-تۇلىك تە كەرەك ەمەس. ماعان ءۇي كەرەك دەپ ايقايلاي باستادى", - دەدى تىلەش.
وسى كەزدە اكىمدىك قىزمەتكەرلەرى تۇرعىن-ءۇي باسقارماسىنا بارىپ، كەزەككە تۇرۋعا كەڭەس بەرەدى. ال تەرگەۋشىلەر تۇسىنىكتەمە جازىپ بەرۋدى تالاپ ەتكەن. وسى كەزدە جالعىزباستى انا ەكى بالاسىن الىپ، كەتىپ قالعان.
