21 myń teńge bermegeni úshin eki balasyn ákimdikke tastap ketti

5670
Kelinshek ákim orynbasarynan áleýmettik kómektiń ekinshi toqsanyna qujattaryn tezirek ótkizip berýin ótingen

 Jalǵyzbasty ana eki balasyn Shymkent qalasy Abaı aýdany ákimdigine tastap ketti. Sputnik Qazaqstan tilshisine suhbat bergen ákim orynbasary Nurlan Tilesh oqıǵanyń mán-jaıyn túsindirip berdi.

"Bul oqıǵa ótken aptada juma kúni bolǵan. Túski asqa shyǵyp bara jatqanymda ol kelinshek tómende qabyldaýda otyrdy. Qolynda emizýli nárestesi, qasynda taǵy eki kishkentaı balasy boldy. 5-6 jasar balalar-aý deımin. Jalpy, tórt bala-shaǵasy bar eken. Men odan neǵyp tursyz dep suraǵanmyn. Ol páter jaldap turatynyn jáne oǵan qaryz ekenin jetkizdi", - deıdi Tilesh.

Abaı aýdany ákimi orynbasarynyń aıtýynsha, kelinshek áleýmettik kómekke balalardyń qujattaryn ótkizgenin aıtyp, sonyń ekinshi toqsanyn tezirek ótkizip berýin ótingen.

Nurlan Tileshtiń ózi kommýnaldyq máselelerge jaýap beredi. Biraq áleýmettik bólimge ótkizip, sol jerdegi mamandardan jalǵyzbasty ananyń qujattaryn qarap shyǵýyn suraǵan.

"Ol kisiden ataýly áleýmettik kómek aıasynda balalardyń 21 myń teńgesin aldyńyz ba dep surap edim, aldym dedi. Birinshi toqsanda bir ret 150 myń aldym, bir ret 170 myń aldym dedi. Durys, bopty dedim. Sodan kelesi toqsannyń aqshasyn tezirek túsirip berseńiz dep surady. Men qyzdarǵa tapsyrdym da, túski asqa ketip qaldym", - dep atap kórsetti Tilesh.

Ákimniń orynbasary úıde otyrǵanda áleýmettik bólimniń qyzdary qońyraý shalyp, jalǵyzbasty ananyń eki balasyn tastap ketip qalǵanyn jetkizedi. Mamandar "102-ge" habar bergen. Al Nurlan Tilesh jumysqa barǵansha prokýratýra men ishki ister organdarynyń qyzmetkerleri kelip, máseleniń mán-jaıyn anyqtaýǵa kirisken.

"Saǵat eki jarymnyń kezinde anasy ózi kelgenin aıtty. Astyna tússem, shynymen de, ol kisi kelipti. Jaǵdaıyn surasam, 30 myń teńgege páter jaldaımyn, jartysyn tólep, jartysyn tóleı almaı jatyrmyn dedi. Biz ol máseleni sheship beretinimizdi aıttym. Basqa másele bar ma desem, azyq-túlik jaǵynan járdem surady. Oǵan da kelistik. Sóıtip turǵanda ol áıel ózinen-ózi kóterilip, maǵan aqsha da, azyq-túlik te kerek emes. Maǵan úı kerek dep aıqaılaı bastady", - dedi Tilesh.

Osy kezde ákimdik qyzmetkerleri turǵyn-úı basqarmasyna baryp, kezekke turýǵa keńes beredi. Al tergeýshiler túsinikteme jazyp berýdi talap etken. Osy kezde jalǵyzbasty ana eki balasyn alyp, ketip qalǵan.

 

Pikirler
Redakııa tańdaýy