قازاقستاندا بۇگىن، 6 مامىردان باستاپ جول ەرەجەسىنە قوسىلعان وزگەرىستەر كۇشىنە ەندى، دەپ حابارلايدى “ادىرنا” ۇلتتىق پورتالى Kolesa.kz سايتىنا سىلتەمە جاساپ.
قر جول ەرەجەسىنە جاڭا 62-1-تارماق قوسىلادى، وندا «1.1. جول تاڭباسىمەن بولىنگەن ەكى جولاعى بار ەكى باعىتتى جولدا جانە 3.20 بەلگىسى (باسىپ وزۋعا تىيىم سالىنادى) قويىلعان جولدا قارسى باعىتقا شىعۋعا بولمايدى» دەپ جازىلادى.
ءبۇتىن سىزىقتى كەسىپ، قارسى جولاققا شىققان جۇرگىزۋشى اكىمشىلىك كودەكستىڭ 596-بابى 3-تارماعىنا ساي جازالانادى. ول بويىنشا «جولدىڭ قارسى قوزعالىسقا ارنالعان بولىگىمەن جۇرسە (كەرى اينالۋ نەمەسە بۇرىلۋ ءۇشىن شىقسا), 6 اي مەرزىمگە كولىك باسقارۋ قۇقىعىنان ايىرىلادى».
سونداي-اق، تەك ءوز جولاعىمەن بۇرىلۋ كەرەك.
53-تارماق («مانەۆر جاساۋ» ءبولىمى) تولىعىپ، «بۇرىلىس جولدىڭ ءجۇرىس بولىگىنىڭ قيىلىسىنان شىققان كەزدە كولىك قۇرالى قارسى كەلە جاتقان كولىك جاعىنا شىقپايتىنداي جۇزەگە اسىرىلادى. بۇرىلىس مانەۆر جاساعان ساتتەگى جولاق بويىنشا جۇزەگە اسىرىلادى» دەپ جازىلادى.
جاڭا تالاپتى وڭعا بۇرىلعاندا دا، سولعا بۇرىلعاندا دا ساقتاۋ كەرەك. قيىلىستا كورشى جولاققا اۋىسۋعا بولمايدى. Kolesa.kz رەداكتسياسىنا قر ىىم اكىمشىلىك پوليتسيا كوميتەتى تۇسىندىرگەندەي، مۇنداي جاعدايدا جۇرگىزۋشى ءوز جولاعىمەن بۇرىلۋى كەرەك، ەگەر ول بوس بولماسا، تىكە ءجۇرۋ كەرەك, قيىلىستا جولاق اۋىستىرۋعا تىيىم سالىنادى.
كوميتەت اۆتوبۋس جولاعى بار كوشەگە (مىسالى، ابايعا) بۇرىلعاندا، جۇرگىزۋشى ارنايى جولاققا ەمەس، اۆتوموبيل جولاعىنا مانەۆر جاساۋى كەرەك ەكەنىن ايتتى. بۇل شەكتەۋ M3 ساناتىنداعى اۆتوبۋستارعا اسەر ەتپەيدى، 6 مامىردان باستاپ ولار ارنايى جولاقپەن جۇرە الادى.
جاڭا 54-1-تارماقتا «راديۋسىنا قاراماستان، قوزعالۋعا قاۋىپسىز بولسا جانە باسقا كولىك قۇرالىنا كەدەرگى جاساماسا عانا كەرى بۇرىلۋعا بولادى» دەپ جازىلادى. ياعني، راديۋسى ۇلكەن قيىلىستا دا، كىشى قيىلىستا دا كەرى بۇرىلۋعا رۇقسات بەرىلەدى. تەك قيىلىساتىن جولمەن ءجۇرىپ بارا جاتقان اۆتوموبيلگە كەدەرگى جاساماساڭىز بولعانى.
ال قيىلىستان ءوتۋ ءتارتىبى 95-1-تارماقتا كورسەتىلگەن. وندا «قيىلىستا سولعا بۇرىلعان كەزدە كەيبىر ەرەكشە گەومەتريالىق پارامەترى بار قيىلىستاردى قوسپاعاندا، قارسى باعىتتا كەلە جاتقان ماشينانىڭ وڭ جاعىنان ءوتۋ كەرەك» دەپ جازىلعان. ياعني، جۇرگىزۋشىلەر ءدال قازىرگىدەي بۇرىلا بەرەدى. بۇل جولعى وزگەرىستە بيلىك قازىرگى سحەمانى زاڭداستىردى.
6 مامىردان باستاپ قوزعالىس قاۋىپسىزدىگى مەن قورشاعان ورتاعا قاۋىپ توندىرەتىن اقاۋلار مەن جاعدايلار تىزىمىنە وزگەرىس ەندى. ەندى تەرەزە دەفلەكتورىن ورناتۋعا بولادى. مۇنداي تيۋنينگ ءۇشىن ەشكىم ءايىپپۇل ارقالاعان ەمەس، بىراق ماماندار بۇل جايلى ارنايى باپ قوسىپ وتىر. ال زاۋىتتىق جۇكسالعىش پەن تىركەمە ورناتۋ قايتا جابدىقتاۋ بولىپ سانالمايدى.
ودان بولەك، جول ەرەجەسىنە جاڭا جول بەلگىلەرى، جول تاڭبالارى جانە باعدارشامداعى جاسىل ءتۇستى «پليۋس» بەلگى قوسىلدى.
