اقمولا وبلىسىندا وتان قورعاۋشىلار كۇنى جانە جەڭىس كۇنى قارساڭىندا «اسكەرگە شاقىرىلۋشىلار كۇنى» – اقمولالىقتاردى مەرزىمدى اسكەري قىزمەتكە شىعارىپ سالۋ اكتسياسى ءوتتى.
سالتاناتتى شارا كەڭەس وداعىنىڭ ەكى مارتە باتىرى، اتاقتى قازاق ۇشقىشى، قازاقستان رەسپۋبليكاسى اۆياتسياسىنىڭ گەنەرال-مايورى تالعات بەگەلدينوۆتىڭ ەسكەرتكىشىنە گۇل شوعىن قويۋدان باستالدى.
ءىس-شارا رەيحستاگقا جەڭىس تۋىن تىككەن قازاق، حالىق قاھارمانى راحىمجان قوشقارباەۆتىڭ 100 جىلدىعىن جانە كەڭەس وداعىنىڭ باتىرى، حالىق قاھارمانى جانە تاۋەلسىز قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆتىڭ تۋعانىنا 100 جىل تولۋىن مەرەكەلەۋگە ارنالدى.
شارادا قۇتتىقتاۋ ءسوز سويلەگەن اقمولا وبلىسى ىشكى ساياسات باسقارماسىنىڭ باسشىسى الماس الين وتان قورعاۋشىلار كۇنىنىڭ ماڭىزدىلىعىنا توقتالدى.
«وتانعا ادال قىزمەت ەتىپ، ونىڭ حالقىن قورعاۋ ءار ەر ازاماتتىڭ اسكەري بورىشى جانە مىندەتتى بولىپ سانالادى. تاۋەلسىزدىك جىلدارىندا قازاقستاندا جاۋىنگەرلىك قابىلەتتى ارميا قۇرىلدى. قر قارۋلى كۇشتەرى زاماناۋي تەحنيكامەن جاراقتاندىرىلىپ، اسكەري كادرلاردىڭ ساپاسى ارتىپ كەلەدى. سونىمەن بىرگە، اسكەري قىزمەتشىلەردىڭ الەۋمەتتىك ماسەلەلەرى دە بىرتىندەپ شەشىلۋدە. وقۋ-جاتتىعۋلار ۇنەمى وتكىزىلىپ تۇرادى، ونىڭ بارىسىندا ءبىزدىڭ اسكەر جوعارى كاسىبي دايارلىقتى، ءىس-قيمىلداردىڭ ۇيلەسىمدىلىگىن جانە تاماشا جاۋىنگەرلىك داعدىنى كورسەتۋدە. اسكەرىمىزدىڭ ازاماتتارىمىزدىڭ تىنىشتىعى مەن ەگەمەن ەلىمىزدىڭ شەكاراسىن قورعايتىنىنا سەنىمدىمىز. وسىنىڭ ارقاسىندا بىزدە بەيبىتشىلىك پەن كەلىسىمدە ءومىر سۇرۋگە، بالالاردى تاربيەلەۋگە جانە تىنىش جۇمىس ىستەۋگە مۇمكىندىك بار. قر قارۋلى كۇشتەرى قاتارىنداعى قىزمەت ءاربىر قازاقستاندىقتىڭ قۇرمەتتى مىندەتى، اعا ۇرپاقتىڭ باتىرلىق جاۋىنگەرلىك داستۇرلەرىنە نەگىزدەلگەن پاتريوتيزم مەكتەبى بولدى جانە بولىپ قالا بەرەدى»، - الماس الين.
اقمولا وبلىسىنىڭ قورعانىس ىستەرى جونىندەگى دەپارتامەنتىنىڭ باستىعى تالعات تۇراباي جانە «قازاقستان رەسپۋبليكاسى قارۋلى كۇشتەرىنىڭ ارداگەرلەرى» قوعامدىق بىرلەستىگى اقمولا وبلىستىق فيليالىنىڭ توراعاسى جانات ەرەجەپوۆ اسكەرگە شاقىرۋشىلاردى وتان الدىندا ادال بولۋعا، سونداي-اق، اسكەري قىزمەتتى ابىرويمەن اتقارۋعا تىلەكتەستىكتەرىن ءبىلدىردى.
«قر قارۋلى قۇشتەرى قاتارىندا اۋە شابۋىلىنا قارسى قورعانىس اسكەرلەرىنە جاتاتىن 44813 ءا/ب قۇرامىندا اسكەري قىزمەت وتكەرۋ ءۇشىن 40 اسكەرگە شاقىرۋشى ىرىكتەلدى. ولار تسەلينوگراد اۋدانىنىڭ اقمول اۋىلىندا اسكەري قىزمەتىن وتەيتىن بولادى. ىرىكتەۋ كەزىندە جاستاردىڭ مورالدىق-پسيحولوگيالىق قاسيەتتەرىنە، دەنساۋلىق جاعدايىنا باستى نازار اۋدارىلدى. ايتا كەتۋ كەرەك، بارلىق اسكەرگە شاقىرىلۋشىلار وتان الدىنداعى اسكەري بورىشتىڭ ماڭىزدىلىعىن ءتۇسىنىپ، سانالى تۇردە قىزمەت ەتۋگە بارادى. ءبىز اقمولا وبلىسىنىڭ قورعانىس ىستەرى جونىندەگى دەپارتامەنتىنە اسكەرگە شاقىرىلۋشىلار كومانداسىن ۋاقتىلى دايىنداعانى، ساپالى ىرىكتەۋى ءۇشىن العىسىمىزدى بىلدىرەمىز»، - دەدى 44813 ءا/ب كومانديرىنىڭ ورىنباسارى بولات حامەتوۆ.
سونىمەن بىرگە، 20 اسكەرگە شاقىرۋشى اقتاۋ قالاسىنا اسكەري قىزمەت وتكەرۋگە اتتانادى.
«اتا-انالار ءۇشىن بۇگىن ەرەكشە ءسات – ۇلدارىمىزدى اسكەر قاتارىنا جىبەرىپ جاتىرمىز. ولاردىڭ وتان الدىنداعى مىندەتتەرىن ورىندايتىنىنا كامىل سەنەمىز. بالالارىمىزعا ەلگە ابىرويلى قىزمەت ەتۋدى تىلەيمىز، - دەپ انالىق اق تىلەگىن ءبىلدىردى اسەكەرگە شاقىرۋشىنىڭ اناسى ساۋلەش مولداعايسينا.
شارا بارىسىندا وبلىس اكىمنىڭ اتىنان اسكەرگە شاقىرۋشىلارعا كەرەك-جاراقتارمەن جابدىقتالعان ريۋكزاك تابىس ەتىلدى.
سونىمەن قاتار، جيىندا بىرقاتار زاپاستاعى وفيتسەرلەر مەن اسكەري قىزمەتشىلەر جاس ۇرپاقتى اسكەري-پاتريوتتىق تاربيەلەۋگە قوسقان ۇلەسى ءۇشىن اقمولا وبلىسى اكىمىنىڭ العىس حاتتارىمەن ماراپاتتالدى.
ۇيىمداستىرۋشىلار اتاپ وتكەندەي، مۇنداي اكتسيالار جاستاردىڭ جانە اسكەري قىزمەتشىلەردىڭ بارلىق ساناتتارىنىڭ بويىندا پاتريوتتىق سانانى، جوعارى مورالدىق-ادامگەرشىلىك قاسيەتتەردى، كونستيتۋتسيالىق جانە اسكەري بورىشقا ادالدىق يدەياسىن، جوعارى جاۋاپكەرشىلىك پەن ءتارتىپتى قالىپتاستىرۋعا، جوعارى مورالدىق رۋحقا قول جەتكىزۋگە جانە قولداۋعا ىقپال ەتەدى. جاستاردى اسكەري بورىشىن ورىنداۋعا ىنتالاندىرا وتىرىپ، قر قارۋلى كۇشتەرىنىڭ وڭ ءيميدجىن جانە اسكەري قىزمەتتىڭ بەدەلىن ارتتىرادى.
