قوسشى قالاسىندا تۇڭعىش مەملەكەتتىك سپورت نىسانى – «ALAN» سپورتتىق ساۋىقتىرۋ كەشەنى پايدالانۋعا بەرىلدى.
كەشەن زاماناۋي سپورتتىق جابدىقتارمەن جانە بارلىق قاجەتتى ماتەريالدىق-تەحنيكالىق قۇرالدارمەن جابدىقتالعان. مۇندا ەرەسەكتەر مەن بالالارعا ارنالعان باسسەيندەر، سپورت زالى، كۇرەس جانە ويىن بولمەسى بار. سونداي-اق، كەشەن اۋماعى اباتتاندىرىلعان كۇركەلەرمەن جانە سىرتتاعى جاتتىعۋ ترەناجەرلارىمەن دا قامتىلعان. نىساننىڭ جوبالىق قۋاتى تاۋلىگىنە 300 ادامدى قۇرايدى. وليمپيادا تىزىمىنە ەنگىزىلگەن سپورتتىڭ 10 تۇرىنەن سەكتسيالار دا بار.
جاڭا نىساندى ارالاعان اقمولا وبلىسىنىڭ اكىمى مارات احمەتجانوۆ بۇل كەشەننىڭ جاستاردىڭ سپورتتىق تاربيەسىن قالىپتاستىرۋدا ماڭىزدى ءرول اتقاراتىنىن اتاپ ءوتتى.
«بۇل وتە جاقسى باستاما. سپورتتىق-ساۋىقتىرۋ ورىندارى ءاربىر قالا تۇرعىنى، سونداي-اق، جاستار مەن مەكتەپ وقۋشىلارى ءۇشىن قولجەتىمدى جانە فۋنكتسيونالدى بولۋى ءتيىس. ونى بارىنشا ءتيىمدى پايدالانىپ، وسكەلەڭ ۇرپاقتىڭ بويىنا ەڭبەككە دەگەن سىيلاستىقتى ءسىڭىرۋ قاجەت دەپ سانايمىن»، - دەدى وبلىس اكىمى.
ايتا كەتەرلىگى، سپورتتىق ساۋىقتىرۋ ورتالىعى اشىلعانعا دەيىن قالادا ءجۇزۋ باسسەينى بولماعان ەدى. ەندى باسسەين ءۇش اۋىسىمدا كۇنىنە 30 ادامدى قابىلداي الادى.
«ءارتۇرلى جاستاعى جانە سپورتشىلار ءۇشىن تاماشا سىيلىق، ەندى ەلورداعا جاتتىعۋ ءۇشىن بارۋدىڭ قاجەتى جوق. ەندى ءوزىمىزدىڭ قالامىزدا سپورتپەن اينالىسۋعا مۇمكىندىك تۋدى. بۇل وتە قۋانتارلىق جاعداي»، - دەپ العاشقى ءجاسوسپىرىم كەلۋشىلەر سپورت كەشەنىنىڭ مۇمكىندىكتەرىن جوعارى باعالادى.
جاڭا نىسانمەن قاتار ەلوردادا بىرەگەي قوعامدىق مادەني-سپورتتىق ورتالىق تا سالىنۋدا. اتالمىش جوبا بولات وتەمۇراتوۆ قورىنىڭ قاراجاتى ەسەبىنەن جۇزەگە اسىرىلۋدا. ايتا كەتۋ كەرەك، ورتالىق وزىق حالىقارالىق تاجىريبەنى ەسكەرە وتىرىپ ازىرلەندى.
قوسشى كورميۋنيتي ورتالىعى قازاقستانداعى مۇنداي ۇلگىدەگى العاشقى ورتالىق بولماق. نىسان ءۇش نەگىزگى ايماقتان – ءبىلىم بەرۋ، مادەني جانە سپورتتىق ايماقتاردان تۇرادى. سونىمەن قاتار، ورتالىقتا كينوتەاتر، تەرراساعا شىعاتىن اسحانا جانە كوۆوركينگ ايماقتارى دا ورنالاستىرىلادى.
ساپاردى قورىتىندىلاعان وبلىس اكىمى دەنە شىنىقتىرۋ-سپورت كەشەنى مەن قوعامدىق مادەني-سپورتتىق ورتالىقتىڭ اشىلۋىمەن قوسشى قالاسى تۇرعىندارىنىڭ سپورتتىق جانە مادەني ءومىرى وزگەرەتىنىن اتاپ ءوتتى.
«بۇل نىسانداردىڭ ىسكە قوسىلۋى بىزگە استانا اگلومەراتسياسىنىڭ باستى مىندەتى – قوسشى قالاسىنىڭ تارتىمدىلىعىن ارتتىرۋ جانە جاڭا جۇمىس ورىندارىن اشۋدى جۇزەگە اسىرۋعا مۇمكىندىك بەرەدى»، - دەپ قورىتىندىلادى م.احمەتجانوۆ.
