اقمولا وبلىسىندا ەل پرەزيدەنتى قاسىم-جومارت توقاەۆتىڭ باستاماسىمەن «تازا قازاقستان» اۋقىمدى رەسپۋبليكالىق ەكولوگيالىق اكتسياسى جالعاسۋدا. بۇگىن «جاسىل ايماق» اكتسياسىنىڭ ءۇشىنشى اپتاسى اياسىندا اقمولالىقتار اعاش وتىرعىزىپ، سەنبىلىك وتكىزدى.
ەكولوگيالىق ءىس-شاراعا بەلسەندى جاستارمەن قاتار بەي-جاي قارامايتىن تۇرعىندار، بيزنەس وكىلدەرى، ەڭبەك ۇجىمدارى جانە تاعى باسقالار ءوز ۇلەستەرىن قوستى. وبلىس بويىنشا بارلىعى 62 مىڭنان استام ادام قاتىستى.
ءىس-شاراعا اقمولا وبلىسىنىڭ اكىمى مارات احمەتجانوۆ قاتىستى. ءوڭىر باسشىسى ينتەرناتسيوناليست-جاۋىنگەرلەر اللەياسىنا جانە «ارقار» مونۋمەنتىنە اعاش وتىرعىزدى.
«ءبىز وسكەلەڭ ۇرپاقتى قورشاعان ورتاعا ۇقىپتى قاراۋعا ۇيرەتۋىمىز، تازالىق مادەنيەتىن قالىپتاستىرۋىمىز قاجەت. ءتارتىپ بار جەردە تازالىق پەن جەڭىس بار»، - دەدى وبلىس اكىمى.
جاقىندا اتا-انا اتانعان جاس وتباسىلار دا اۋقىمدى اكتسياعا قوسىلدى. وسى كۇنى بالالارمەن بىرگە ولار «ءسابي» اللەياسىنا 30 اتاۋلى اعاش وتىرعىزدى. اتاۋلى قاراعايلاردى كوپ بالالى ءامىرحانوۆتار وتباسى دا وتىرعىزدى.
«بۇگىنگى كۇن ءبىزدىڭ وتباسىمىزدىڭ جادىندا قالادى. ءبىز اعاشتاردى وتىرعىزىپ قانا قويماي، ەكولوگيالىق تاربيەنىڭ ماڭىزدىلىعىن ۇلگى ەتتىپ كورسەتەمىز. ۇلكەن بالالار اللەياعا كەلىپ، كوشەتتەرىن كۇتىپ-باعۋدى قالايدى»، - دەدى اقتوتى ءامىرجانوۆا.
ايتا كەتەيىك، كوكشەتاۋ قالاسىندا 8000-عا جۋىق ادام اكتسياعا قاتىستى. 3500 م3 قوقىس شىعارىلدى.
