«اشىق زاڭدى تۇلعالار» پورتالىندا قر دەنساۋلىق ساقتاۋ مينيسترلىگىنىڭ ەلدەگى ابيۋزەرلەرگە ءماجبۇرلى پسيحولوگيالىق تەراپيانى ەنگىزۋگە قاتىستى بۇيرىعى جاريالاندى. وسى قۇجاتقا سايكەس، تۇرمىستىق زورلىق-زومبىلىق جاساعان ادامداردى پسيحوتەراپەۆتىك كۋرستان ءوتۋ ءتارتىبى مەن ەمدەۋ باعدارلاماسى بەكىتىلدى، دەپ حابارلايدى “ادىرنا” ۇلتتىق پورتالى.
“بۇيرىق جوباسىندا زورلىق-زومبىلىققا قاتىستى قۇقىق بۇزۋشىلىق جاساعان ادامدارعا پسيحولوگيالىق كومەك كورسەتۋ ءتارتىبى، سونداي-اق پسيحولوگتارعا مەديتسينالىق-پسيحولوگيالىق تۇزەتۋ باعدارلاماسىن جۇرگىزۋ جانە تۇرمىستىق زورلىق-زومبىلىق جاساعان ادامدارمەن جۇمىس جۇرگىزۋ تالاپتارى قاراستىرىلعان” دەلىنگەن تۇسىندىرمە حاتتا.
وسىلايشا، دەنساۋلىق ساقتاۋ مينيسترلىگى وتباسىنداعى اگرەسسورلاردىڭ مىنەز-قۇلقىن وزگەرتۋگە، ولاردى ەموتسيالارىن باسقارۋعا ۇيرەتۋگە جانە جانجالداردى شەشۋدىڭ باسقا جولدارىن ىزدەۋگە كومەكتەسپەك.
سونىمەن قاتار، پسيحولوگتارعا تۇزەتۋ باعدارلاماسىن جۇرگىزۋ جانە تۇرمىستىق زورلىق-زومبىلىق جاساعان ادامدارمەن جۇمىس ىستەۋ تالاپتارى بەكىتىلۋدە. قۇجاتقا سايكەس، دەنساۋلىق ساقتاۋ مەكەمەلەرىندە پسيحولوگيالىق تۇزەتۋ جۇمىستارى جۇرگىزىلەدى.
ۇقساس جاڭالىقتار
