تابيعي اپات كەزىندە سۋ باسقان ەلدى مەكەندەردەن 422 جۇكتى ايەل ەۆاكۋاتسيالانىپ، 405 ايەل امان-ەسەن بوساندى، دەپ حابارلايدى “ادىرنا” ۇلتتىق پورتالى kaz.inform.kz سايتىنا سىلتەپ.
دەنساۋلىق ساقتاۋ مينيسترلىگىنىڭ رەسمي وكىلى ايگەرىم ورازاليەۆانىڭ ايتۋىنشا، بارلىق سابيلەر مەن انالار پاتروناجدىق قىزمەتتەردىڭ قامقورلىعىنا الىنعان.
ايتۋىنشا، مەديتسينالىق كومەكتىڭ بارلىق تۇرلەرىنىڭ قولجەتىمدىلىگىن قامتاماسىز ەتۋ ءۇشىن جەدەل مەديتسينالىق كومەك قىزمەتتەرىنىڭ، ستاتسيونارلاردىڭ قابىلداۋ پۋنكتتەرىنىڭ جۇمىسى كۇشەيتىلدى.
«سۋ تاسقىنى باستالعالى ەۆاكۋاتسيالىق پۋنكتتەردە بارلىعى 106 مەديتسينالىق پۋنكت اشىلدى، ونىڭ ىشىندە بۇگىندە اقتوبە، باتىس قازاقستان، قوستاناي، سولتۇستىك قازاقستان، ماڭعىستاۋ، اتىراۋ وبلىستارىنىڭ ەۆاكۋاتسيالانعان تۇرعىندارى ءۇشىن 59 مەديتسينالىق پوست جۇمىس ىستەۋدە. مەديتسينالىق جانە مەديتسينالىق-پسيحولوگيالىق كومەك كورسەتۋ ءۇشىن 2100 مەديتسينا قىزمەتكەرى، ونىڭ ىشىندە 299 دارىگەر، 90 پسيحولوگ تارتىلدى»، - دەدى ءا. ورازاليەۆا ورتالىق كوممۋنيكاتسيالار قىزمەتىندە.
ەۆاكوپۋنكتتەردە مەديتسينالىق جانە مەديتسينالىق-پسيحولوگيالىق كومەك كورسەتۋگە 742 مەديتسينا قىزمەتكەرى، ونىڭ ىشىندە 143 دارىگەر، سونداي-اق 69 پسيحولوگ تارتىلدى.
«سۋ تاسقىنى باستالعاننان بەرى سۋ باسقان ايماقتاردان سوزىلمالى اۋرۋلارى بار 1360-قا جۋىق ادام ەۆاكۋاتسيالاندى. ولاردىڭ ارقايسىسى مەديتسينا قىزمەتكەرلەرىنىڭ باقىلاۋىندا، ءدارى-دارمەكتەرمەن قاجەتتى كولەمدە قامتاماسىز ەتىلۋدە. تاسقىننان زارداپ شەككەن 2 مىڭنان استام ادامعا پسيحولوگيالىق كومەك كورسەتىلدى»، - دەگەن دەنساۋلىق ساقتاۋ مينيسترلىگىنىڭ رەسمي وكىلى ايگەرىم ورازاليەۆا.
ءساۋىردىڭ 1-ىندە اقتوبە وبلىسىنىڭ ىرعىز اۋدانىنداعى سۋ باسقان نۇرا اۋىلىندا ايەل جۇكتىلىكتىڭ 36 اپتاسىندا مەرزىمىنەن بۇرىن بوسانعانى حابارلانعان. سول كەزدە وبلىستىق دەنساۋلىق ساقتاۋ باسقارماسىنىڭ جىبەرگەن اكۋشەر - گينەكولوگ، انەستەزيولوگ-رەانيماتولوگتان قۇرالعان بريگادا تاسقىن سالدارىنان مەجەلى جەرگە دەيىن بارا الماعان. سوندا اۋىل دارىگەرلەرى انانى ءوز بەتتەرىنشە بوساندىرۋىنا تۋرا كەلگەن. سوندا جەرگىلىكتى دارىگەرلىك امبۋلاتورياعا جەتكىزىلگەن انا جالپى تاجىريبەلىك دارىگەر مەن مەدبيكەنىڭ قاتىسۋىمەن ايەل ءساتتى بوسانعان. سالماعى 2.8 كگ جانە 3.50 كگ بولاتىن ەگىز قىز دۇنيەگە كەلگەن. سوڭىنان اناسى مەن نارەستەلەرى قورعانىس مينيسترلىگىنىڭ تىكۇشاعىمەن اۋدان ورتالىعىنداعى اۋرۋحاناعا جەتكىزىلگەن.
