2019 جىلدىڭ 10 شىلدەسىندە الەۋمەتتىك جەلىلەردە ءبىر كەلىنشەتىڭ قىزىلوردا وبلىسى پوليتسەيلەرىنىڭ جەرگىلىكتى تۇرعىندى ولتىرگەنىن ايتقان ۆيدەوسى تاراعان.
ول مارقۇمنىڭ تۋىسقانى بولىپ شىقتى. ۆيدەو ارقىلى كەلىنشەك باق وكىلدەرىنەن كومەك سۇراعان.
«بۇگىن تۇندە قىزىلوردا قالاسىنىڭ 4 پوليتسيا قىزمەتكەرى 1976 جىلعى اجىمباەۆ باۋىرجان شاكىمۇلىن ۇستاۋ كەزىندە اياۋسىز سوققا جىعىپ، ءولتىردى. مۇنداي باسسىزدىقتى بۇكىل ەل ءبىلۋى كەرەك دەپ سانايمىن! بۇل ىسكە قاتىستىلاردىڭ بارلىعى جازادان تىس قالماسا دەپ سۇرايمىن. مەنىڭ اتى-ءجونىم – اجار ءاپساماتوۆا. قايعى جۇتقان انا جالعىز ۇلىنان ايىرىلدى»، - دەپ جازدى ول.
بۇل جايتقا قاتىستى قىزىلوردا وبلىستىق پوليتسيا دەپارتامەنتىنىڭ ءباسپاسوز قىزمەتى پىكىر ءبىلدىردى. ولاردىڭ ايتۋىنشا، ەر ادام اياق-استىنان ءوزىن ناشار سەزىنگەن.
«2019 جىلى 10 شىلدەدە تۇندە قىزىلوردا قالاسىنىڭ 43 جاستاعى تۇرعىنى ماس بولىپ، كولىك جۇرگىزگەن. پوليتسيا توقتاتىپ، ونى كولىكتەن ءتۇسۋىن سۇراعاندا ول قارسىلىق كورسەتكەن. سوندىقتان پوليتسەيلەر ونى ەكى قولىنان ۇستاپ، قىزمەتتىك كولىككە الىپ كەلە جاتقاندا ول ەسىنەن تانىپ قالادى. بىردەن جەدەل جاردەم قىزمەتىنە قوڭىراۋ شالىنادى. بىراق دارىگەرلەر جەتكەنشە ول كىسى كوز جۇمعان. بۇل وقيعا پوليتسيا كولىگىنىڭ ۆيدەوتىركەشىگىنە دە تۇسكەن. ونىڭ ۇستىنە مەديتسينالىق ساراپتاما كەزىندە مارقۇمنىڭ دەنەسىنەن زورلىق-زومبىلىق بەلگىلەرى تابىلماعان. بۇل كىسىنىڭ ولىمىنە قاتىستى قىزىلوردا وبلىستىق پوليتسياسى جەكە قاۋىپسىزدىك باسقارماسىمەن سوتقا دەيىنگى تەرگەۋ امالدارى جۇرگىزىلىپ جاتىر. وقيعانىڭ ءمان-جايى ءالى انىقتالۋ ۇستىندە»، - دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
"ادىرنا" ۇلتتىق پورتالى
