وبلىس اكىمى دانيال احمەتوۆ تارباعاتاي اۋدانىنا جاساعان جۇمىس ساپارى بارىسىندا 2016 جىلى باستالعان ايماقتىڭ ارحەولوگيالىق ەسكەرتكىشتەرىن زەرتتەۋ بويىنشا وبلىستىق باعدارلامانىڭ ەكىنشى كەزەڭىن ىسكە اسىرۋ بارىسىمەن تانىستى. ەلەكە سازى جازىعىندا ەلىمىزدىڭ تانىمال ارحەولوگتارى زەينوللا ساماشەۆ پەن ابدەش تولەۋبەكوۆ باستاعان زەرتتەۋشىلەر توبى بيىلعى جىلى تابىلعان قۇندى جادىگەرلەرمەن تانىستىردى.
2019 جىلدىڭ باستى جاڭالىعى - ەلەكە سازى جازىعىنداعى «پاتشا» قورىمىنان تابىلعان ءمۇيىزى التىن سىمنان ورىلگەن بۇعىنىڭ بەينەسى جانە التىننان قۇيىلعان ارقار مۇسىندەرى مەن ۇساق مونشاقتار.
وتكەن جىلعى قازبا جۇمىستارىندا ەلەكە سازىندا «التىن ادام» تابىلعان بولاتىن. ال بيىل دا وسى اۋماقتان ەرەكشە جادىگەرلەر تابىلىپ وتىر. ولار ءبىزدىڭ زامانىمىزعا دەيىنگى سەگىزىنشى عاسىرداعى اتا-بابالارىمىزدىڭ مادەنيەتى مەن تۇرمىس-تىرشىلىگىن سيپاتتايدى. - العاشقى قادامىمىز جامان ەمەس، ءۇمىتىمىز زور. ازىرگە العاشقى جادىگەرلەردى عانا قازىپ الدىق، قالعانى وسى ايدىڭ اياعىنا قاراي تولىق قازىپ الىنادى دەگەن ويدامىن، – دەيدى زەينوللا ساماشەۆ.
بۇل قازاقستان تاريحىنا دەگەن جاڭاشا كوزقاراس. حالقىمىزدىڭ تاريحىن قايتا جازدىراتىن تىڭ مۇرالار. كونە جادىگەرلەر ءبىزدىڭ تەك كوشپەلى ەل بولماعانىمىزدى ايقىندايدى. ولار اتا-بابامىزدىڭ ءبىزدىڭ زامانىمىزعا دەيىنگى سەگىزىنشى عاسىردا-اق جوعارى دەڭگەيدەگى وركەنيەتتى قالىپتاستىرعانىن دالەلدەيدى. بيىل وبلىس اكىمدىگى «ۇلى دالا التىنى» كورمەسىن ستامبۋل قالاسىندا ۇيىمداستىرادى. ال 2020 جىلى انگليا ەلىنىڭ كورمەلەرىنە جەتكىزۋ جوسپارى تۇر.
– ەلەكە سازى ءبىزدىڭ زامانىمىزعا دەيىنگى سەگىزىنشى عاسىر مەن ءبىزدىڭ زامانىمىزدىڭ سەگىزىنشى عاسىرىنا دەيىنگى ارالىقتا ۇزدىكسىز دامۋ بايلانىسىنىڭ بارىن بىلدىرەتىن قۇبىلىس. جۇمىستار اياقتالعان سوڭ بۇل اتىراپ حالقىمىزدىڭ ماقتانىشىنا اينالاتىنىنا سەنىمدىمىن. سونىمەن قاتار مۇندا ازيا قۇرلىعىندا كەزدەسپەيتىن قاعان كەشەنىن دە زەرتتەيمىز. ءبىز بىلگە قاعاننىڭ، كۇلتەگىننىڭ كەشەندەرى موڭعوليادا تابىلعانىن بىلەمىز. ەلەكە سازىندا تابىلعان كەشەن ولاردىڭ پلانەگرافياسىن قايتالايتىن بىرەگەي كەشەن. جاقىن ارادا ءبىزدىڭ قوس عالىمىمىز الەمگە جاڭا قازاقستاندى كورسەتەتىنىنە سەنىمدىمىن، – دەدى دانيال كەنجەتايۇلى.
الداعى ۋاقىتتا ابدەش تولەۋبەكوۆتىڭ جەتەكشىلىگىمەن ءىرى قورعانداردىڭ ءبىرى سانالاتىن «ساردار-1» قورىمى اشىلاتىن بولادى. ايتا كەتسەك، اتالمىش ۋچاسكەنى قازۋ بارىسىندا ەرتە ساق داۋىرىنە تيەسىلى كەزەڭدە قولدانىلعان مەديتسينالىق قۇرالدار مەن تەمىر پىشاقتار جانە قانجار قىنىمەن تابىلعان بولاتىن.
"ادىرنا" ۇلتتىق پورتالى
