Shyǵys Qazaqstandaǵy Eleke sazy qorǵanynan altyn jádiger tabyldy

3059

Oblys ákimi Danıal Ahmetov Tarbaǵataı aýdanyna jasaǵan jumys sapary barysynda 2016 jyly bastalǵan aımaqtyń arheologııalyq eskertkishterin zertteý boıynsha oblystyq baǵdarlamanyń ekinshi kezeńin iske asyrý barysymen tanysty. Eleke sazy jazyǵynda elimizdiń tanymal arheologtary Zeınolla Samashev pen Ábdesh Tóleýbekov bastaǵan zertteýshiler toby bıylǵy jyly tabylǵan qundy jádigerlermen tanystyrdy.

2019 jyldyń basty jańalyǵy - Eleke sazy jazyǵyndaǵy «Patsha» qorymynan tabylǵan múıizi altyn symnan órilgen buǵynyń beınesi jáne altynnan quıylǵan arqar músinderi men usaq monshaqtar.

Ótken jylǵy qazba jumystarynda Eleke sazynda «Altyn adam» tabylǵan bolatyn. Al bıyl da osy aýmaqtan erekshe jádigerler tabylyp otyr. Olar bizdiń zamanymyzǵa deıingi segizinshi ǵasyrdaǵy ata-babalarymyzdyń mádenıeti men turmys-tirshiligin sıpattaıdy. - Alǵashqy qadamymyz jaman emes, úmitimiz zor. Ázirge alǵashqy jádigerlerdi ǵana qazyp aldyq, qalǵany osy aıdyń aıaǵyna qaraı tolyq qazyp alynady degen oıdamyn, – deıdi Zeınolla Samashev.

Bul Qazaqstan tarıhyna degen jańasha kózqaras. Halqymyzdyń tarıhyn qaıta jazdyratyn tyń muralar. Kóne jádigerler bizdiń tek kóshpeli el bolmaǵanymyzdy aıqyndaıdy. Olar ata-babamyzdyń bizdiń zamanymyzǵa deıingi segizinshi ǵasyrda-aq joǵary deńgeıdegi órkenıetti qalyptastyrǵanyn dáleldeıdi. Bıyl oblys ákimdigi «Uly dala altyny» kórmesin Stambýl qalasynda uıymdastyrady. Al 2020 jyly Anglııa eliniń kórmelerine jetkizý jospary tur.

– Eleke sazy bizdiń zamanymyzǵa deıingi segizinshi ǵasyr men bizdiń zamanymyzdyń segizinshi ǵasyryna deıingi aralyqta úzdiksiz damý baılanysynyń baryn bildiretin qubylys. Jumystar aıaqtalǵan soń bul atyrap halqymyzdyń maqtanyshyna aınalatynyna senimdimin. Sonymen qatar munda Azııa qurlyǵynda kezdespeıtin Qaǵan keshenin de zertteımiz. Biz Bilge qaǵannyń, Kúlteginniń keshenderi Mońǵolııada tabylǵanyn bilemiz. Eleke sazynda tabylǵan keshen olardyń planegrafııasyn qaıtalaıtyn biregeı keshen. Jaqyn arada bizdiń qos ǵalymymyz álemge jańa Qazaqstandy kórsetetinine senimdimin, – dedi Danıal Kenjetaıuly.

Aldaǵy ýaqytta Ábdesh Tóleýbekovtyń jetekshiligimen iri qorǵandardyń biri sanalatyn «Sardar-1» qorymy ashylatyn bolady. Aıta ketsek, atalmysh ýchaskeni qazý barysynda erte saq dáýirine tıesili kezeńde qoldanylǵan medıınalyq quraldar men temir pyshaqtar jáne qanjar qynymen tabylǵan bolatyn.

 

"Adyrna" ulttyq portaly

Pikirler
Redakııa tańdaýy