سەنات دەپۋتاتى بيبىگۇل جەكسەنباي پرەزيدەنت قاسىم-جومارت توقاەۆ قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قاتىستى پىكىرىن ءبىلدىردى، دەپ حابارلايدى «ادىرنا» ءتىلشىسى.
«ۇلتتىق قۇرىلتايدا كوتەرىلىپ، قوعامدىق ۇلكەن تالقىلاۋدان وتكەن تاعى ءبىر اسا ماڭىزدى ماسەلە زاڭمەن بەكىتىلدى.
مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
زاڭدا شەگۋگە كەلمەيتىن تەمەكى ونىمدەرىن، ۆەيپتەردى، حوش يىستەندىرگىشتەردى جانە ولارعا ارنالعان سۇيىقتىقتاردى ساتۋعا، تاراتۋعا، سونداي-اق ولاردى جارنامالاۋعا تىيىم سالۋ قاراستىرىلعان. سونىمەن بىرگە، جاستار اراسىندا قۇرامىندا نيكوتينى بار زاتتاردىڭ تارالۋىنىڭ الدىن الۋ جانە وعان قارسى كۇرەسۋ ءۇشىن جۇيەلى شارالار قابىلداۋعا زاڭ مۇمكىندىكتەر بەرەدى. بۇل زاڭ ارقىلى وسكەلەڭ ۇرپاقتىڭ دەنساۋلىعىن ساقتاۋ باعىتىندا مەملەكەتتىك كەشەندى قادام جاسالىپ وتىر.
وزدەرىڭىز بىلەتىندەي، كەشەگى پاندەميا كەزىندە اق حالاتتى ابزال جاندار ءوز ومىرلەرىن قاتەرگە تىگە ءار ناۋقاستىڭ جانى ءۇشىن كۇرەسكە شىقتى. مەديتسينا ماماندارىنىڭ قوعامداعى ماڭىزدىلىعى كۇن سايىن ارتىپ كەلەدى. الايدا، سايلاۋشىلارمەن كەزدەسۋ بارىسىندا ءدال وسى مەديتسينا ماماندارىنىڭ تاراپىنان قۇقىقتىق-قارجىلىق ماسەلەلەر ءجيى كوتەرىلەدى. ونىڭ ءبىرسىپىراسىن ءوزىم دە دەپۋتاتتىق ساۋال تۇرىندە ۇكىمەتكە جولداعان دا ەدىم.
مەملەكەت باسشىسى قول قويعان زاڭ مەديتسينا قىزمەتكەرلەرىن قۇقىقتىق جانە قارجىلىق تۇرعىدان قورعاۋ جۇيەسىن ەنگىزۋگە جانە ولاردىڭ جاۋاپكەرشىلىگىن ارتتىرادى»،—دەدى ول.
