اقمولا وبلىسىنىڭ كراسنىي يار اۋىلىنداعى كوپسالالى يننوۆاتسيالىق كوللەدجى وبلىستىق «تجكب ۇزدىك ۇيىمى» بايقاۋىندا ۇزدىك دەپ تانىلدى.
وبلىستىق ءبىلىم باسقارماسىنىڭ مالىمەتىنشە، كوللەدج تاريحى سوناۋ 1939 جىلدىڭ 23 قازانىنان باستالادى. العاشقىدا بۇل اۋىل شارۋاشىلىعىن مەحانيكالاندىرۋ مەكتەبى بولدى، سودان كەيىن وقۋ ورنى تۇرلەندىرىلىپ جاڭا ماماندىقتار اشىلدى، اتاۋى دا وزگەردى. بيىل كوللەدج ءوزىنىڭ 85 جىلدىق مەرەيتويىن اتاپ وتكەلى وتىر.
كوللەدج جىل سايىن WorldSkills قوزعالىسىنا قاتىسىپ جەتەكشى ورىندارعا يە بولۋدا. كوللەدج ستۋدەنتتەرى رەسپۋبليكالىق، حالىقارالىق كاسىبي شەبەرلىك كونكۋرستارىنىڭ جەڭىمپازدارى بولىپ تابىلادى. 2023 جىلى كوللەدج ستۋدەنتى البەكوۆا البينا فرانتسياداعى اbilympics حالىقارالىق بايقاۋىندا قازاقستان كومانداسىنىڭ قورجىنىنا مەدالون اكەلدى.
كوللەدج شاعىن جانە ءىرى بيزنەس-قاۋىمداستىق كاسىپورىندارىمەن ءوزارا ىنتىماقتاستىق تۋرالى كوپتەگەن كەلىسىمدەر جاسادى. ونىڭ ىشىندە اگروتەحنيكالىق باعىتتاعى 34 كاسىپورىن جانە قىزمەت كورسەتۋ سالاسىنداعى 10 كاسىپورىن. مۇنداي ىنتىماقتاستىقتىڭ جارقىن مىسالى كوللەدج بازاسىندا «تeam-Agro» جشس-مەن بىرلەسىپ ەلەۆاتورلىق جابدىقتاردى ازىرلەۋ، دايىنداۋ جانە قۇراستىرۋ جونىندەگى كاسىپورىننىڭ اشىلۋى بولدى.
ايتا كەتەيىك، تەحنيكالىق جانە كاسىپتىك ءبىلىم بەرۋدىڭ ۇزدىك ۇيىمىن انىقتاۋعا ارنالعان وبلىستىق كونكۋرس التى جىلدان بەرى وتكىزىلىپ كەلەدى. ەرەجەگە سايكەس، كوللەدجدەر ۇيىمنىڭ، پەداگوگتاردىڭ، ستۋدەنتتەردىڭ جەتىستىكتەرىمەن پورتفوليو ۇسىنادى. كونكۋرستىق كوميسسيا ۇيىم قىزمەتىنىڭ ساپاسىن، بيزنەس-قوعامداستىقپەن ءوزارا ءىس-قيمىلدى، كونكۋرستارعا، يننوۆاتسيالىق جوبالارعا قاتىسۋدى، ءبىلىم الۋشىلار كونتينگەنتىنىڭ ساقتالۋىن باعالايدى.
سونداي-اق، كوشباسشىلاردىڭ بەستىگىنە چاگلينكا اۋىلىنىڭ جوعارى اگروتەحنيكالىق كوللەدجى، اگروبيزنەس جانە سەرۆيس كوللەدجى (استراحان اۋىلى), ششۋچينسك قالاسىنىڭ جوعارى تەحنيكالىق كوللەدجى، ششۋچينسك قالاسىنىڭ جوعارى پەداگوگيكالىق كوللەدجى ەندى.
