Astana qalasynda 2024 jyldyń 8-14 qyrkúıegi aralyǵynda 5-shi Dúnıejúzilik kóshpendiler oıyndary ótedi. Oǵan daıyndyq qalaı júrip jatqanyn májilistiń áleýmettik-mádenı damý komıtetiniń otyrysynda Týrızm jáne sport mınıstri Ermek Marjyqpaev baıandady, dep habarlaıdy “Adyrna” ulttyq portaly.
«Elordada ótetin Dúnıejúzilik kóshpendiler oıynyna 100-den astam elden jalpy sany 3000-ǵa jýyq adamnan turatyn delegaııalar qatysady dep kútilip otyr. Búgingi tańda 75 el qatysatynyn resmı rastady», - dedi ol.
Mınıstrdiń aıtýyna qaraǵanda, oıynda baǵdarlamasyna 20 jarystyq jáne 10 kórneki sport túri kirgen, 110 medal jıyntyǵy sarapqa salynady.
«Jarys at sporty, ulttyq kúres, sadaq atý, qusbegilik, dástúrli zııatkerlik oıyndar boıynsha ótedi», - dedi Ermek Marjyqpaev.
Aıta keteıik, buǵan deıin Qazaqstan Prezıdenti Qasym-Jomart Toqaev sý tasqynyna baılanysty qarjyny únemdeý maqsatynda Astana halyqaralyq forýmyn toqtatqan edi.
“Memleket basshysy Qasym-Jomart Toqaev elimizdegi joıqyn sý tasqynynyń saldaryn joıý jáne zardap shekken azamattarǵa kómektesý úshin basqa sharalarǵa jumsalatyn qarjyny barynsha únemdeý qajet ekenin eskere otyryp, bıylǵy 13-14 maýsymǵa josparlanǵan Astana halyqaralyq forýmyn ótkizbeý týraly sheshim qabyldady” delingen Aqorda habarlamasynda.
