سەمەيدە شىعىس قازاقستان وبلىسىنىڭ جازعى دەمالىس ورىندارىنا دەمالۋعا كەلگەن ارىس قالاسىنىڭ بالالارىن سالتاناتتى قارسى الدى.
تەمىرجول ۆوكزالىندا ارىستان كەلگەن بالالارعا شاشۋ شاشىلىپ، سەمەي قالاسى اكىمىنىڭ ورىنباسارى ايدار سادىرباەۆ ءوز تىلەگىن ءبىلدىردى.
- اباي، شاكارىم، مۇحتارداي ۇلىلار تۋعان قاسيەتتى مەكەنگە قوش كەلدىڭىزدەر! بۇگىندە بارشا قازاق ەلى ارىسپەن بىرگە. شىعىس قازاقستان وبلىسىنىڭ اكىمى دانيال كەنجەتايۇلى احمەتوۆتىڭ تىكەلەي تاپسىرماسى بويىنشا، ارىستان شىعىستىڭ شىرايلى جەرلەرىنە 300 بالانى قابىلداۋ شەشىمى شىققان بولاتىن. مىنە، بۇگىن العاشقى توپ كەلىپ جاتىر. بارشاڭىزعا جاقسى دەمالىس بولسىن. كۇش-قۋات جيناپ، وقۋلارىڭىزعا تىڭ دايىندىقپەن بارىپ، اتا-اتانالارىڭىزدى قۋانتاسىزدار دەگەن ويدامىن، - دەدى ا.سادىرباەۆ.
ايتا كەتەيىك، ارىس قالاسىنان 10 شىلدە كۇنى كەلگەن 150 بالا 10 كۇن وسكەمەن قالاسىنا قاراستى «گورنايا ۋلبينكا»، كاتونقاراعايدىڭ «ارايلى شىعىس» جانە سەمەيدىڭ «قاراعايلى» شيپاجايلارىندا دەمالاتىن بولادى.
- ارىس قالاسىنان كەلگەن بالالار «قاراعايلى» شيپاجايىندا دەمالىپ قانا قويماي، سونىمەن قاتار تۇزدى ۇڭگىر مەن وتتەگى كوكتەيلى سىندى ەمدىك-ساۋىقتىرۋ شارالارىن قابىلدايدى. بارلىق بالالار دارىگەردىڭ تىكەلەي باقىلاۋىندا بولادى. بالالار ولكەنى تانۋ ماقساتىندا اباي اۋدانىنداعى «جيدەباي» جەرىنە بارىپ، سونىمەن قاتار قالانىڭ كورىكتى ورىندارىمەن تانىستىرۋ جۇمىستارى جوسپارلانعان، - دەدى سەمەي قالاسىنىڭ ءبىلىم ءبولىمىنىڭ باسشىسى ناتاليا فەسەنكو.
ارىس قالاسىنان كەلگەن بالالاردى وبلىس اۋماعىنداعى لاگەرلەردە ۇمىتىلماس دەمالىس كۇتىپ تۇر. باعدارلاماعا سايكەس، بالالاردىڭ جازعى دەمالىستارىن جوعارى دەڭگەيدە وتكىزۋلەرى ءۇشىن ۇيىمداستىرۋشىلار مەن تاربيەشىلەر تابيعات اياسىندا ساياحاتتاۋ، تازا اۋادا دەمالۋمەن قاتار، مەرەكەلىك كونتسەرتتەرىمەن قۋانتپاق.
سونداي-اق، اعىمداعى جىلدىڭ شىلدە ايىنىڭ 15-25 ارالىعىندا ارىستان 70 بالا كەلەدى دەپ كۇتىلۋدە. ونىڭ ىشىندە 20 بالا ريددەر قالاسىنىڭ «سينەگورە» لاگەرىنە جىبەرىلسە، ال 50 بالا گلۋبوكوە اۋدانىنىڭ «تولاعاي» جازعى لاگەرىنە جولداما الماق. ال، ءۇشىنشى لەك شىلدە ايىنىڭ 28 مەن تامىز ايىنىڭ 7 ارالىعىنا جوسپارلانعان. 80 بالانىڭ 30 الاكول ماڭىنا جاقىن «ءۇرجارايىم» لاگەرىندە دەمالسا، ال قالعان 50 بالا تومەنگى تايىنتى اۋىلىنىڭ «بولاشاق» لاگەرىنە جىبەرىلەتىن بولادى.
"ادىرنا" ۇلتتىق پورتالى
