Semeıde Shyǵys Qazaqstan oblysynyń jazǵy demalys oryndaryna demalýǵa kelgen Arys qalasynyń balalaryn saltanatty qarsy aldy.
Temirjol vokzalynda Arystan kelgen balalarǵa shashý shashylyp, Semeı qalasy ákiminiń orynbasary Aıdar Sadyrbaev óz tilegin bildirdi.
- Abaı, Shákárim, Muhtardaı ulylar týǵan qasıetti mekenge qosh keldińizder! Búginde barsha qazaq eli Aryspen birge. Shyǵys Qazaqstan oblysynyń ákimi Danıal Kenjetaıuly Ahmetovtyń tikeleı tapsyrmasy boıynsha, Arystan Shyǵystyń shyraıly jerlerine 300 balany qabyldaý sheshimi shyqqan bolatyn. Mine, búgin alǵashqy top kelip jatyr. Barshańyzǵa jaqsy demalys bolsyn. Kúsh-qýat jınap, oqýlaryńyzǵa tyń daıyndyqpen baryp, ata-atanalaryńyzdy qýantasyzdar degen oıdamyn, - dedi A.Sadyrbaev.
Aıta keteıik, Arys qalasynan 10 shilde kúni kelgen 150 bala 10 kún Óskemen qalasyna qarasty «Gornaıa Ýlbınka», Katonqaraǵaıdyń «Araıly Shyǵys» jáne Semeıdiń «Qaraǵaıly» shıpajaılarynda demalatyn bolady.
- Arys qalasynan kelgen balalar «Qaraǵaıly» shıpajaıynda demalyp qana qoımaı, sonymen qatar tuzdy úńgir men ottegi kokteıli syndy emdik-saýyqtyrý sharalaryn qabyldaıdy. Barlyq balalar dárigerdiń tikeleı baqylaýynda bolady. Balalar ólkeni taný maqsatynda Abaı aýdanyndaǵy «Jıdebaı» jerine baryp, sonymen qatar qalanyń kórikti oryndarymen tanystyrý jumystary josparlanǵan, - dedi Semeı qalasynyń bilim bóliminiń basshysy Natalııa Fesenko.
Arys qalasynan kelgen balalardy oblys aýmaǵyndaǵy lagerlerde umytylmas demalys kútip tur. Baǵdarlamaǵa sáıkes, balalardyń jazǵy demalystaryn joǵary deńgeıde ótkizýleri úshin uıymdastyrýshylar men tárbıeshiler tabıǵat aıasynda saıahattaý, taza aýada demalýmen qatar, merekelik konertterimen qýantpaq.
Sondaı-aq, aǵymdaǵy jyldyń shilde aıynyń 15-25 aralyǵynda Arystan 70 bala keledi dep kútilýde. Onyń ishinde 20 bala Rıdder qalasynyń «Sınegore» lagerine jiberilse, al 50 bala Glýbokoe aýdanynyń «Tolaǵaı» jazǵy lagerine joldama almaq. Al, úshinshi lek shilde aıynyń 28 men tamyz aıynyń 7 aralyǵyna josparlanǵan. 80 balanyń 30 Alakól mańyna jaqyn «Úrjaraıym» lagerinde demalsa, al qalǵan 50 bala Tómengi Taıynty aýylynyń «Bolashaq» lagerine jiberiletin bolady.
"Adyrna" ulttyq portaly
