«كيەلى مەكەن» اپتالىعى اياسىندا شقو-داعى مەكەمەلەر مەن كاسىپورىنداردىڭ ۇجىمدارى، جەرگىلىكتى اتقارۋشى ورگانداردىڭ وكىلدەرى، جاستار مەن تۇرعىندار تاريحي-مادەني ەسكەرتكىشتەردىڭ اۋماعىن اباتتاندىرۋدا.
وسكەمەندەگى قابانباي باتىر ەسكەرتكىشىنىڭ ماڭىندا سەنبىلىك باستالدى. 2014 جىلى اشىلعان بۇل التى مەترلىك مونۋمەنتتىڭ اۆتورى – نۇرلان دالباي. اتى اڭىزعا اينالعان قولباسشى ات ۇستىندە بەينەلەگەن.
– اباتتاندىرۋدى ناق وسى قابانباي باتىر ەسكەرتكىشىنەن باستاعانىمىزدىڭ وزىندىك ءمانى بار. بۇل – جاي عانا مونۋمەنتالدى تاريحي-مادەني نىسان ەمەس، قاسيەتتى ورىن! سوندىقتان وسى اۋماقتى تارتىپكە كەلتىرىپ، اباتتاندىرۋ وتە ماڭىزدى، – دەيدى شقو قوعامدىق كەڭەسىنىڭ مۇشەسى الديار اۋباكىروۆ.
«تازا قازاقستان» اكتسياسىنا قاتىسۋشىلار قىس مەزگىلىندە ەسكەرتكىشتىڭ اينالاسىنا جينالىپ قالعان بۇكىل قوقىستى تازارتتى. ءبىر اپتا ىشىندە ولار شىعىس قازاقستانداعى باسقا دا كيەلى ورىنداردىڭ اۋماعىن رەتكە كەلتىرەدى.
ەستەرىڭىزگە سالا كەتەيىك، مەملەكەت باسشىسى قاسىم-جومارت توقاەۆتىڭ باستاماسىمەن ەلىمىزدە «تازا قازاقستان» اكتسياسى ءوتىپ جاتىر. ول بەس اپتاعا سوزىلادى، ءار اپتا بەلگىلى ءبىر تاقىرىپقا ارنالعان.
