اقمولا وبلىسىنىڭ اكىمى مارات احمەتجانوۆ جۇمىس ساپارىمەن جارقايىڭ اۋدانىنىڭ ۇشقاراسۋ اۋىلىندا بولىپ، سۋ تاسقىنىنان قيىندىق كورىپ وتىرعان تۇرعىندارمەن كەزدەستى.
ەسىل وزەنى ارناسىنان اسىپ، تاسۋى سالدارىنان ۇشقاراسۋ اۋىلى سۋدىڭ ورتاسىندا قالدى. اۋىلعا كولىك قاتىناسى مۇلدەم ءۇزىلدى. بۇگىنگى تاڭدا ەلدى مەكەندە ازىق-تۇلىك ونىمدەرىنىڭ اسسورتيمەنتى، دارىلىك پرەپاراتتار جەتكىلىكتى. توتەنشە جاعدايلار قىزمەتتەرى قايىق ارقىلى گۋمانيتارلىق كومەكتى قاجەتىنشە جەتكىزىپ جاتىر.
«اۋىلدىڭ تاماقسىز جانە نازارسىز قالعانى تۋرالى الەۋمەتتىك جەلىدە تاراپ جاتقان كەيبىر مالىمەتتەر شىندىققا جاناسپايدى. بۇگىن ءوزىم وسى ەلدى مەكەنگە بارىپ، تۇرعىنداردىڭ ءوز اۋىزدارىنان جاعدايلارىن سۇراپ ءبىلدىم. اۋىلدا ەلەكترمەن جابدىقتاۋدا ماسەلە بار، ونى ەرتەڭ شەشەمىز»، - دەدى مارات احمەتجانوۆ.
وسىعان بايلانىستى وبلىس باسشىلىعى اتالمىش اۋىلدى ەلەكتر قۋاتىمەن قامتاماسىز ەتۋ ءۇشىن ارقايسىسىنىڭ قۋاتى 1000 كيلوۆاتت بولاتىن ەكى ەلەكتر گەنەراتورىن جىبەرۋ تۋرالى شەشىم قابىلدادى. گەنەراتورلار ەكى كۇندە اۋىلعا جەتكىزىلەتىن بولادى. سونىمەن بىرگە، اۋىلعا تاۋلىك بويى كولىك قاتىناسى ءۇشىن 2 قايىق بولىنگەن.
