Aqmola oblysynyń ákimi Marat Ahmetjanov jumys saparymen Jarqaıyń aýdanynyń Úshqarasý aýylynda bolyp, sý tasqynynan qıyndyq kórip otyrǵan turǵyndarmen kezdesti.
Esil ózeni arnasynan asyp, tasýy saldarynan Úshqarasý aýyly sýdyń ortasynda qaldy. Aýylǵa kólik qatynasy múldem úzildi. Búgingi tańda eldi mekende azyq-túlik ónimderiniń assortımenti, dárilik preparattar jetkilikti. Tótenshe jaǵdaılar qyzmetteri qaıyq arqyly gýmanıtarlyq kómekti qajetinshe jetkizip jatyr.
«Aýyldyń tamaqsyz jáne nazarsyz qalǵany týraly áleýmettik jelide tarap jatqan keıbir málimetter shyndyqqa janaspaıdy. Búgin ózim osy eldi mekenge baryp, turǵyndardyń óz aýyzdarynan jaǵdaılaryn surap bildim. Aýylda elektrmen jabdyqtaýda másele bar, ony erteń sheshemiz», - dedi Marat Ahmetjanov.
Osyǵan baılanysty oblys basshylyǵy atalmysh aýyldy elektr qýatymen qamtamasyz etý úshin árqaısysynyń qýaty 1000 kılovatt bolatyn eki elektr generatoryn jiberý týraly sheshim qabyldady. Generatorlar eki kúnde aýylǵa jetkiziletin bolady. Sonymen birge, aýylǵa táýlik boıy kólik qatynasy úshin 2 qaıyq bólingen.
