باتىس قازاقستاندا سۋ تاسقىنى قاۋپى سەيىلمەي تۇر. ايماقتا 7 مىڭعا جۋىق ادام ەۆاكۋاتسيالانعانى بەلگىلى بولدى، دەپ حابارلايدى "ادىرنا" ءتىلشىسى قازاقپاراتقا سىلتەپ.
وبلىس اكىمى ناريمان تورەعاليەۆ وڭىردەگى سۋ تاسقىنىنا بايلانىستى ۇندەۋ جاسادى.
«قۇرمەتتى باتىس قازاقستاندىقتار! تاسقىن سۋدىڭ سالدارىنان ءوڭىرىمىزدىڭ 5 اۋدانىندا جانە ورال قالاسىندا بىرنەشە تۇرعىن ۇيلەردى سۋ باسقان بولاتىن. بۇدان بولەك، ورال قالاسى ماڭىنداعى ساياجايلارعا دا سۋ كىردى. جالپى وبلىس بويىنشا 7 مىڭعا جۋىق ادام قاۋىپسىز جەرگە كوشىرىلدى، ونىڭ 3 مىڭنان استامى – بالالار. ەۆاكۋاتسيالىق پۋنكتتەردە قاجەتتى جاعدايلار جاسالىپ جاتىر»، - دەدى اكىم.
اكىم رەسەيدىڭ كورشىلەس ساراتوۆ جانە ورىنبور وبلىستارىنداعى سۋ قويمالارىنان كوپ مولشەردە سۋ جىبەرىلىپ جاتقانىن ايتادى. ساراتوۆ وبلىسىنداعى پريۋزەن سۋ قويماسىنان قاراوزەنگە سەكۋندىنا 431 تەكشەمەتر سۋ ءتۇسىپ جاتقانى انىقتالدى.
قازىرگى ۋاقىتتا وڭىردە سۋ تاسقىنىنىڭ ەكىنشى كەزەڭى باستالعان. كورشىلەس رەسەيدىڭ ورسك قالاسىندا دامبى بۇزىلىپ، ەلدى مەكەندەر مەن تۇرعىن ۇيلەردى سۋ باسقان. بۇل باتىس قازاقستان وبلىسىنا دا قاۋىپ ءتوندىرۋى مۇمكىن ەكەن.
ال ورىنبور وبلىسىنىڭ ورسك قالاسىندا ەكىنشى دامبىنىڭ جارىلعانىن رەسەي توتەنشە جاعدايلار مينيسترلىگىنىڭ ءباسپاسوز قىزمەتى حابارلاعان.
"ورسك قالاسىندا ەكىنشى جاعالاۋ بوگەتىنىڭ جارىلۋى بولدى. رەسەيدىڭ توتەنشە جاعدايلار مينيسترلىگى سۋ باسۋى مۇمكىن ايماقتارعا الدىن الا كۇشتەر مەن قۇرالداردى جينادى. ەۆاكۋاتسيالاۋ جالعاسۋدا", - دەپ حابارلايدى رف توتەنشە جاعدايلار مينيسترلىگى.
رەسەيدىڭ تەرگەۋ كوميتەتى جاۋاپتىلاردىڭ ۇستىنەن قىلمىستىق ءىس قوزعاعان. سالدارىنان جايىق وزەنىندەگى سۋ دەڭگەيى وتە قاۋىپتى دەڭگەيگە جەتۋى مۇمكىن دەگەن بولجام جاريالاندى.
قازاقستاننىڭ توتەنشە جاعدايلار مينيسترلىگى ورسك قالاسىنداعى ءبىرىنشى بوگەتتىڭ بۇزىلۋى باتىس قازاقستان وبلىسىنا قاۋىپ توندىرمەيتىنىن ايتقان ەدى.
