ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلاماسىنىڭ اياسىندا ۇيىمداستىرىلعان وبلىستىق ارداگەرلەر كەڭەسىنىڭ كوشپەلى وتىرىسى زايسان قالاسىندا بولدى. 40-تان اسا ارداگەرلەردى وبلىستىق ارداگەرلەر كەڭەسىنىڭ توراعاسى شەرۋباەۆ ايتقازى سەيىتۇلى باستاپ كەلدى.
اۋداندىق «اق اجەلەر»، دايىر اۋىلدىق وكرۋگىنىڭ «عاسىر اجە» ءان-بي ءانسامبلىنىڭ اجەلەرى ءوز زامانداستارىنىڭ قادامىن قۇتقا بالاپ شاشۋ شاشىپ، اق تىلەكتەرىن ارنادى.
اردەگەرلەر القاسى ءىس-شارانى «مۇراگەر» اتتى ارداگەرلەر ۇيىندە سەمينار-كەڭەسپەن باستادى. وندا ايتقازى سەيىتۇلى جىل باسىنان بەرى ءار اۋداندىق ارداگەرلەر كەڭەسى توراعالارىنىڭ اتقارعان جۇمىستارىن سارالاپ ايتىپ بەردى.
كەلەسى ءسوز كەزەگىن العان وبلىستىق ارداگەرلەر كەڭەسى توراعاسىنىڭ ورىنباسارى قۇسانوۆا عاليا بەيسەمبايقىزى اۋداندىق ارداگەرلەر كەڭەسىنىڭ توراعالارىن الداعى ۋاقىتتا اتقارىلۋى ءتيىس تاپسىرمالارمەن تانىستىردى.
كەلەسى كۇنى ارداگەرلەر قالاداعى مايدانگەرلەر ەسكەرتكىشىندە بولىپ، سوعىس دالاسىنان ورالماعان بوزداقتاردى ءبىر مينۋت ۇنسىزدىكپەن ەسكە الدى. گۇل شوقتارىن قويىپ، تاعزىم ەتتى.
بۇدان كەيىن ارداگەرلەر ءۇشىنشى التىن ادام تابىلعان كيەلى ءوڭىر شىلىكتىگە ساپار شەكتى. ايتا كەتسەك، «رۋحاني جاڭعىرۋ» باعدارلاماسى اياسىندا قازاقستاننىڭ كيەلى ورىندارىنىڭ رەسپۋبليكالىق كارتاسىنا شقو-نىڭ 8 تاريحي وبەكتىسى ىرىكتەلىپ الىنعان بولاتىن. سونىڭ ءبىرى – شىلىكتى قورىعى. وبلىستا «رۋحاني جاڭعىرۋ» باعدارلاماسىن جۇزەگە اسىرۋ جۇمىستارى جۇيەلى تۇردە جۇرگىزىلۋدە. نەگىزى بۇل ءوڭىردىڭ تاريحي جادىگەرلەر مەن كيەلى مەكەندەرگە باي ەكەنى بەلگىلى. سونىڭ ءبارى تىزىمگە الىنىپ، ارنايى باعدارلامالار قابىلداندى. ناتيجەسىندە، قوڭىر اۋليە ۇڭگىرى جانە ىرعىزباي اتا كەسەنەسىمەن قاتار، وڭىردەگى كيەلى جەرلەر كارتاسىنا شىلىكتى، بەرەل قورىمدارى، ابلايكيت عيباداتحاناسى، «اباي-شاكارىم» مەموريالدى كەشەنى، قيىن-كەرىش، بەلۋحا، اشۋتاس تاۋلارى، «قوزى كورپەش-بايان سۇلۋ» كەسەنەسى، «الاش ارىستارى» مۋزەيى جانە تاعى باسقا قاستەرلى ورىندار ەنگىزىلگەن. وسىلاردىڭ ىشىندە ءبىزدىڭ زامانىمىزعا دەيىنگى VIII-VI عاسىرلارعا تيەسىلى، زايسان اۋدانىندا ورنالاسقان شىلىكتى قورىمىنىڭ ورنى بولەك. وبلىس اكىمى دانيال احمەتوۆتىڭ ۇيىتقى بولۋىمەن 2017 جىلى تانىمال ارحەولوگ عالىمدار زەينوللا ساماشەۆ پەن ابدەش تولەۋوۆ باستاعان ەكسپەديتسيا شىلىكتى وڭىرىندەگى زەرتتەۋ جۇمىستارىن جالعاستىرىپ، التىنمەن كومكەرىلگەن ساق پاتشاسىنىڭ سۇيەگى تابىلعان بولاتىن. جالپى، ەلباسىنىڭ «رۋحاني جاڭعىرۋ» باعدارلاماسى تاريحي جادىگەرلەردى زەرتتەۋگە، قۇندى دەرەكتەردى جانداندىرۋعا باعىتتالعانىن اتاپ ءوتۋ كەرەك.
مۇندا ارداگەرلەر قاۋىمى التىن ادام تابىلعان قورىمداردى كوردى. سونىمەن قاتار زەينوللا بۇتابايۇلى مەن قوڭىر قاجى ءماجيتۇلىنىڭ مازارىنىڭ باسىنا بارىپ، ولاردىڭ رۋحىنا باعىشتاپ قۇران وقىدى.
زايسان ءوڭىرىن ەكى كۇن ارالاعان ارداگەلەر قاۋىمى تاعىلىمدى جەرلەردەن رۋحاني ازىق الىپ، تاماشا تابيعاتقا تامسانىپ قايتتى.
"ادىرنا" ۇلتتىق پورتالى
