پوليتسيا بۇرىنعى پرەزيدەنت نۇرسۇلتان نازارباەۆتىڭ قىزى ءاليا نازارباەۆاعا، سونداي-اق كونستيتۋتسيالىق كەڭەستىڭ بۇرىنعى توراعاسى يگور روگوۆتىڭ ايەلى ۆالەنتينا روگوۆاعا قاتىستى قىلمىستىق ءىس قوزعاۋدان باس تارتتى، دەپ حابارلايدى "ادىرنا" پورتالى "تپك ازيا" جشس قۇرىلتايشىسى نۇرلان ءبيمۋرزيننىڭ مالىمدەمەسىنە سىلتەپ.
بيمۋرزين قازتاگ رەداكتسياسىنا بەرگەن سۇحباتىندا قىلمىستىق ءىس بويىنشا قانداي ارەكەتتەر جاسالىنعانىن اتادى:
"وسى جىلدىڭ 14 ناۋرىزىندا مەملەكەت باسشىسى توقاەۆ باس پروكۋرور اسىلوۆپەن كاسىپتى بوپسالاۋشىلاردان قورعاۋ تاقىرىبىندا كەزدەسۋ وتكىزدى. ال 19 اقپاندا مەعدات قاليەۆ ەكەۋىمىز باس پروكۋراتۋراعا ارىز جازدىق. پرەزيدەنتىمىزدىڭ تاپسىرماسىنا قاراماستان، باس پروكۋراتۋرا ءىستى قارجى مونيتورينگى اگەنتتىگىنە (قما) جىبەرەدى، دەگەنمەن قما-دان ماعان ەشكىم حابارلاسپادى جانە ەشقانداي تەرگەۋ ارەكەتتەرىن جۇرگىزبەدى. ولار مەنى المالى اۋداندىق ىشكى ىستەر بولىمىنە دەيىن اپاردى، بىراق مەنىڭ المالى اۋدانىنا مۇلدەم قاتىسىم جوق، ءتىپتى وندا تۇرۋعا ىقتيارحاتىم دا جوق. ءبىز كەلدىك، ارىزىمىز بويىنشا تۇسىنىكتەمە بەردىك، قاعاز جۇزىندە دالەلدەر اكەلدىك. پرەزيدەنت تاپسىرماسىنا قاراماستان، ولار قۇجاتتى دۇرىس قارامادى، كەشە قىلمىستىق ءىس قوزعاۋدان باس تارتىپ، كونستيتۋتسيالىق قۇقىعىمىزدى قايتا بۇزدى", - دەدى ول 5 ساۋىردەگى مالىمدەمەسىندە.
بيمۋرزين الماتى قالاسى المالى اۋداندىق ىشكى ىستەر بولىمىنەن نازارباەۆاعا جانە باسقا دا تۇلعالارعا قاتىستى ارىز نومەنكلاتۋرالىق ءىس رەتىندە ەسەپتەن شىعارىلعانىن كورسەتەتىن حاتتىڭ كوشىرمەسىن ۇسىندى.
"بۇل - قىلمىستىق ءىستى قاراۋدان باس تارتۋ تۋرالى جاۋاپ، ءبىز قازىر وسى ءىس بويىنشا شاعىم تۇسىردىك جانە ونى تەرگەۋ سوتىنا جىبەرەمىز", - دەپ اتاپ ءوتتى بيمۋرزين.
كاسىپكەر روگوۆاعا قاتىستى جاعدايعا دا تۇسىنىكتەمە بەردى.
"روگوۆا حانىمعا كەلەتىن بولساق، ول ءبىزدىڭ سۇحباتتارىمىز بەن سويلەگەن سوزدەرىمىزگە اشۋمەن جاۋاپ بەرەدى. ءبىزدى كوزبەن كورمەگەنىن، سونداي-اق ءبىزدىڭ جالا جابۋمەن جانە بوپسالاۋمەن اينالىسىپ جاتقانىمىزدى ايتادى. بىراق بۇل الدىمەن بەكىتىلىپ، قامتاماسىز ەتىلۋى كەرەك. قاليەۆپەن بىرگە جاريالاپ وتىرعان سەنىمحاتتار، بۇل كومپانيامىزدىڭ "تپك ازيا" جشس قىزمەتىنە قاتىستى ەكەنىن كورسەتەدى. جانە ول ءبىزدىڭ اكتيۆتەردى Sinooil-عا ساتۋعا قاتتى كىرىستى. جالپى، ءبىز قاليەۆ ەكەۋمىز قانىشەر ەمەسپىز، بۇل جەردە ەشكىمدى تۇرمەگە قاماعىمىز كەلمەيدى، ت.ب. ءبىز جاي عانا مەنشىك قۇقىعىمىزدى قالپىنا كەلتىرىپ، مورالدىق ازاپتىڭ ورنىن تولتىرعىمىز كەلەدى", - دەدى بيمۋرزين.
ەسكە سالايىق، بيمۋرزين 28 اقپاندا سەرىكتەسى قاليەۆ ەكەۋى نازارباەۆا مەن روگوۆانىڭ رەيدەرلىك شابۋىلىنىڭ قۇربانى بولعانىن حابارلاعان بولاتىن.
"2003 جىلى (نازارباەۆا – رەد) ءوز ىقپالىن پايدالانا وتىرىپ، قۇنى 170 ميلليون دوللاردى قۇرايتىن (2003 جىلعى ەسەپ بويىنشا) جەتى مۇناي بازاسى مەن 96 جانارماي قۇيۋ ستانتسياسىنان تۇراتىن جۇمىس ىستەپ تۇرعان كاسىپورىندى باسىپ الدى. رەيدەرلىك بارىسىندا ول بۇرىنعى مەنشىك يەلەرىن تۇرمەگە قاماپ، دەنە جاراقاتىن سالامىن دەپ قورقىتتى. ءتىپتى ول كۇندىز الماتىنىڭ ورتالىعىندا كاسىپ يەلەرىنىڭ ءبىرىنىڭ اكەسىن اشىقتان-اشىق ۇرلاپ اكەتكەن جانە كۋاگەرلەردىڭ ايتۋىنشا، ۇرلاۋعا قۇقىق قورعاۋ قىزمەتكەرلەرىنىڭ قاتىسى بولۋى مۇمكىن", - دەپ ايتقان بولاتىن كاسىپكەرلەر.
14 ناۋرىزدا باس پروكۋراتۋرا نازارباەۆانىڭ رەيدەرلىك ارەكەتى تۋرالى كاسىپكەرلەردىڭ ارىزىن تىركەگەنىن حابارلاعان ەدى.
