اتىراۋ وبلىسىنىڭ اكىمى سەرىك شاپكەنوۆ بىرنەشە كۇننەن بەرى تاسقىن سۋدىڭ الدىن الۋ جۇمىستارىنا اتسالىسقان تۇرعىندارعا العىسىن ءبىلدىردى، دەپ حابارلايدى «ادىرنا» ءتىلشىسى.
«وبلىستا سۋ تاسقىنىنا بايلانىستى جاعداي وتە كۇردەلى. اتىراۋ وبلىسىندا بەس وزەن بار. ۇشەۋى اقتوبە وڭىرىنەن، ەكەۋى رەسەي فەدەراتسياسىنان باستاۋ الادى. قازىرگى تاڭدا اقتوبە وبلىسىنان باستالاتىن وزەندەرگە قاتىستى قاۋىپ سەيىلدى. ولار ساعىز جانە ويىل وزەندەرى. جەم وزەنى ءوز ارناسىنان شىعىپ، كەڭ كولەمدە جايىلىپ، قۇلسارى قالاسىن قورشاۋعا الدى. سونىڭ سالدارىنان ەكى مولتەك اۋدانعا سۋ كىردى. جۇزگە جۋىق تۇرعىن ءۇيدى سۋ باستى»،—دەدى ايماق باسشىسى.
اتىراۋ وبلىسىنىڭ اكىمدىگى جاعداي تۇراقتالعان سوڭ ارنايى كوميسسيا قۇرىلاتىنىن مالىمدەدى. ولار كەلتىرىلگەن زالالدى ەسەپتەپ، ماتەريالدىق شىعىنداردى تولەۋمەن اينالىسادى.
