ەنەرگەتيكا ءمينيسترى الماسادام ساتقاليەۆ جىلۋ قىزمەتتەرى تاريفتەرىن كوتەرۋ كەرەكتىگىن ايتتى، دەپ حابارلايدى "ادىرنا" ۇلتتىق پورتالى.
«جىلۋ قىزمەتتەرىنە كەلەتىن بولساق، شارتتى تۇردە، ءيا، ولاردى كوبەيتۋ كەرەك. بۇل ءاربىر جەكە كاسىپورىنعا بايلانىستى. جالپى، جىلۋ ورتالىقتارىنىڭ توزۋى شامامەن 70 پايىزدى قۇراپ وتىر»، - دەپ جاۋاپ بەردى الماسادام ساتقاليەۆ تاريفتەردى كوتەرۋ قاجەتتىگى تۋرالى سۇراققا.
بۇل رەتتە ول باعانىڭ بىردەن وسپەيتىنىن اتاپ ءوتتى.
"بۇل شارالار شۇعىل قابىلداندى. ويتكەنى شۇعىل ارەكەت ەتۋ قاجەت بولدى. كاسىپورىندار ەنەرگەتيكا سالاسىنداعى كاسىبي مامانداردىڭ جالاقىسىن سالالىق ورتاشا جالاقى دەڭگەيىنە كوتەرۋ ءۇشىن جانە قىسقى مەرزىمگە جوندەۋ جۇمىستارىن جۇرگىزۋ ماقساتىندا تاريفتەردى كوتەرۋدى سۇرادى. ونىڭ وزىندە كەيبىر سالالاردا جۇمىسشىلاردىڭ جالاقىسى سالالىق ورتاشا جالاقى دەڭگەيىنە جەتپەگەنىن ايتقىم كەلەدى. وتكەن جولعى تاريفتەردىڭ كوتەرىلۋى وسى ەكى سەبەپكە – ستانتسيالاردىڭ توزۋىمەن جانە جالاقى كوتەرۋ ماسەلەسىمەن بايلانىستى بولدى»،– دەدى ساتقاليەۆ.
جۋرناليستەردىڭ «الداعى ۋاقىتتا تاريفتەر ءدال وسىلاي ەكى ەسە كوتەرىلىپ كەتپەي مە؟» دەگەن سۇراعىنا مينيستر: «بۇل كاسىپورىنداردىڭ وتىنىشتەرىنە بايلانىستى. وتىنىشتەرىن قابىلداپ العان سوڭ عانا تاريفتەردىڭ قانشالىقتى كوتەرىلەتىنىن ناقتى ايتا الامىز»،- دەپ جاۋاپ بەردى.
ايتۋىنشا، وتكەن جىلى كاسىپورىندار تاريفتەردى 60-70 پايىزعا كوتەرۋ جونىندە ءوتىنىش بىلدىرگەن. بىراق مينيسترلىك 30 پايىز دەڭگەيىندە كوتەرۋ تۋرالى شەشىم شىعارعان.
