Energetika ministrı Almasadam Sätqaliev jylu qyzmetterı tarifterın köteru kerektıgın aitty, dep habarlaidy "Adyrna" ūlttyq portaly.
«Jylu qyzmetterıne keletın bolsaq, şartty türde, iä, olardy köbeitu kerek. Būl ärbır jeke käsıporynǧa bailanysty. Jalpy, jylu ortalyqtarynyŋ tozuy şamamen 70 paiyzdy qūrap otyr», - dep jauap berdı Almasadam Satqaliev tarifterdı köteru qajettıgı turaly sūraqqa.
Būl rette ol baǧanyŋ bırden öspeitının atap öttı.
"Būl şaralar şūǧyl qabyldandy. Öitkenı şūǧyl äreket etu qajet boldy. Käsıporyndar energetika salasyndaǧy käsıbi mamandardyŋ jalaqysyn salalyq ortaşa jalaqy deŋgeiıne köteru üşın jäne qysqy merzımge jöndeu jūmystaryn jürgızu maqsatynda tarifterdı köterudı sūrady. Onyŋ özınde keibır salalarda jūmysşylardyŋ jalaqysy salalyq ortaşa jalaqy deŋgeiıne jetpegenın aitqym keledı. Ötken jolǧy tarifterdıŋ köterıluı osy ekı sebepke – stansiialardyŋ tozuymen jäne jalaqy köteru mäselesımen bailanysty boldy»,– dedı Sätqaliev.
Jurnalisterdıŋ «aldaǧy uaqytta tarifter däl osylai ekı ese köterılıp ketpei me?» degen sūraǧyna ministr: «Būl käsıporyndardyŋ ötınışterıne bailanysty. Ötınışterın qabyldap alǧan soŋ ǧana tarifterdıŋ qanşalyqty köterıletının naqty aita alamyz»,- dep jauap berdı.
Aituynşa, ötken jyly käsıporyndar tarifterdı 60-70 paiyzǧa köteru jönınde ötınış bıldırgen. Bıraq ministrlık 30 paiyz deŋgeiınde köteru turaly şeşım şyǧarǧan.
Ūqsas jaŋalyqtar
