Áleýmettik jelide aǵyndy sýdan qyz balany arqalap ótken er adamnyń áreketi talqylanyp jatyr, dep habarlaıdy "Adyrna" tilshisi.
Áleýmettik jelige taraǵan vıdeoda topan sýdan óte almaı turǵan qyzdy er adam arqalap, jaǵaǵa shyǵarǵan.
Beınede qyz balanyń “Qandaı áserli sát” degen daýsy estiledi.
Ómir Shynybekuly Facebook jelisindegi paraqshada:
"Qyzdy arqalap sýdan ótkizgen jigittiń aty-jóni Qapııat Dáýlet eken. Aqshasy tólengen taksıden túsip kete barǵan qyzdy tanysańyzdar, jigittiń betinen "shóp" etkizgende keremet kórinis bolar edi, átteń-aı... Qyzdyń sheshesine sálem aıtyńyzdar. Qyzyna tipti "rahmet" aıtýdy úıretpepti. Árıne jigit alǵys alý úshin ótkizgen joq... Degenmen, kez-kelgen eńbektiń óteýi eń qurysa bir aýyz jyly sóz bolýy kerek", - dep jazdy.
BI Group dırektorlar keńesiniń tóraǵasy Aıdyn Rahymbaev vıdeodaǵy jigit kompanııa qyzmetkeri ekenin jazdy.
“Onyń esimi – Qapııat Dáýlet, bizdiń qatardaǵy qyzmetker, Astanadaǵy nysandardyń birinde jedel esep mamany. Qıyn jaǵdaıda sózsiz kómekke keletin jigitterdi maqtan tutamyn. Osy bir topan sý kúninde apatty jeńýge kómektesetin de dál osyndaı jigitter”, – dep jazdy Rahymbaev Facebook paraqshasynda.
Sonymen qosa Aıdyn Rahymbaev sý basqan óńirlerge kompanııasynyń qarjylaı kómekti arttyratynyn da aıtty.
“Naǵyz jigitter osyndaı qıyn kezderde synalady. Dáýlet degen bizdiń qarapaıym jumysshy, naǵyz azamat. Eń bastysy, el basyna kún týǵanda birigip, bir-birimizge kómek kórsetsek, bárin jeńemiz”, – dedi ol.
