قوستاناي وبلىسى، جانگەلدين اۋدانى، بايتۇرسىن اۋىلىنىڭ جۇرتى دابىل قاعۋدا. ۇيلەرىن سۋ باسقان تۇرعىندار شۇعىل كومەك سۇراۋدا، دەپ حابارلايدى "ادىرنا" ۇلتتىق پورتالى. ازاماتتاردىڭ جان-ايقايىن بەلسەندى، جۋرناليست دينا ەلگەزەك الەۋمەتتىك جەلىدە ءبولىستى.
قوستاناي وبلىسىنداعى احمەت بايتۇرسىنۇلى اتىنداعى اۋىل تۇرعىندارى ۇيلەرىنىڭ سۋعا كەتكەنىن ايتىپ، كومەك سۇراۋدا. ۆيدەوداعى ازاماتتىڭ ايتۋىنشا، اپاتتىڭ الدىن الىپ، ءوز بەتىنشە بوگەتتەر جاساپ، توتەنشە جايتتى قايتارماق بولعان. الايدا قاتتى جەلدىڭ سالدارىنان ەڭبەكتەرى تەككە كەتىپ، 6 ءۇيدى سۋ باسىپ قالعان.
بۇدان بولەك، اۋدان ورتالىعىنان 120 شاقىرىم جەردە ورنالاسقان اقكول جانە احمەت اۋىلىنىڭ جولدارىن سۋ شايىپ، اۋىل تۇرعىندارى بايلانىسسىز قالعان. ايماقتاعى قازىرگى احۋال ازىرگە بەلگىسىز.
"30 ناۋرىز كۇنى تۇنگى ساعات 4:00-دە ۇلت ۇستازى احمەت بايتۇرسىنۇلى اۋىلىنىڭ (قوستاناي وبلىسى، جانگەلدين اۋدانى) تۇرعىندارى دابىل قاعىپ، كومەك سۇراعان حابارلاما كەلدى. اۋدان ورتالىعىنان 120 كم قاشىقتىقتا جاتقان اقكول جانە احمەت اۋىلى 3-4 كۇن بۇرىن جولدارىن سۋ شايىپ، بايلانىس ۇزىلگەن بولاتىن. سونىمەن قاتار، اۋىل اعىندى سۋدىڭ ورتاسىندا قالدى. قازىرگى تاڭدا سۋدىڭ مولشەرى اسىپ، ۇيلەردى سۋ شايا باستاعان" دەپ جازدى دينا ەلگەزەك.
