«اق جول» زەينەتاقى قورىنداعى كەلەسى الاياقتىقتى تەكسەرۋدى تالاپ ەتتى – وسىنداي حات بۇگىن قر پرەمەر-ءمينيسترىنىڭ ءبىرىنشى ورىنباسارى-قارجى ءمينيسترى ءاليحان ساميىلوۆقا جولداندى. ءسوز ازاماتتاردىڭ زەينەتاقى قورىنداعى اقشاسىن ساقتاۋ مەن ونىڭ اشىقتىقتىعى تۋرالى قوزعالدى، سەبەبى بىرىڭعاي جيناقتاۋ زەينەتاقى قورى قۇرىلعاننان كەيىن، كەيبىر جەكەمەنشىك زەينەتاقى قورلارى بولاشاق زەينەتكەرلەردىڭ اقشاسىن جۇمساپ، ولاردى قايتارماعانى بەلگىلى بولدى.
مىسالى، بىرىڭعاي جيناقتاۋ زەينەتاقى قورىنىڭ رەسمي سايتىنداعى اقپاراتقا سايكەس (https://www.enpf.kz/ru/.about/press-center/media-about-fund/?ELEMENT_ID=2856), 2017 جىلدىڭ تامىزىندا قور باسشىلىعى ءتورت ميلليارد تەڭگە سوماسىن قايتارۋ بويىنشا مەرزىمىن وتكىزىپ الۋعا بايلانىستى «يمستالكون» اق لاۋازىمدى تۇلعالارىن قىلمىستىق جاۋاپكەرشىلىككە تارتۋدى تالاپ ەتىپ، قۇقىق قۇرعاۋ ورگاندارىنا ءوتىنىش جازعان. ءىس قر قارجى مينيسترلىگىنىڭ ەكونوميكالىق تەكسەرىس دەپارتامەنتىندە جاتىر.
«بۇدان بەرى 2 جىل وتكەنىمەن، قوعام حالىقتىڭ ميللياردتاعان اقشاسى نە بولعانى، ولاردىڭ ءتيىس دەڭگەيدە قولدانىلماۋىنا كىم جاۋاپتى ەكەندىگى جانە ونىڭ قايتارىلىمى جونىندە حابارسىز.
ماسەلە زەينەتاقى قورىنىڭ قاراجاتى – مەملەكەت شەشىمىمەن مىندەتتەلگەن سالىمى جونىندە ەكەنىن قايتالاپ وتەيىك، ياعني مەملەكەت حالىق الدىندا جاي جاۋاپتى عانا ەمەس، ول سالىمشىلارعا قور تۋرالى تولىق ءارى ناقتى اقپارات بەرۋگە مىندەتتى»، - دەلىنەدى حاتتا.
«اق جولدىڭ» پىكىرىنشە، «يمستالكون» جونىندە تاعى ءبىر ەسكەرەتىن جايت بار. بۇقارالىق اقپارات قۇرالدارىنىڭ جاريالانىمدارىنا قاراعاندا، اتى شۋلى ىسكە كومپانيانىڭ ءۇش نەگىزگى اكتسيونەرىنىڭ ەكەۋى عانا كۇدىكتى دەپ تانىلعان – ديرەكتورلار كەڭەسىنىڭ توراعاسى سەرىك ەسمۇقانوۆ پەن باس ديرەكتور ۆلاديمير كانانىحين. ال ءۇشىنشى اكتسيونەر ميحايل رەزۋنوۆ ءالى دە قۇرىلىس فيرماسىن باسقارۋدا، ياعني اقشانىڭ جوعالۋىنا بايلانىستى ەش قاتىسى جوق دەگەن ءسوز. ءۇشىنشى كۇدىكتى دەپ، ەكونوميكالىق جوسپارلاۋ ءبولىمى باسشىسىنىڭ ورىباسارى (باسشىسى دا ەمەس), ياعني قول قويۋ قۇقىعى جوق جانە ماتەريالدى جاۋاپكەرشىلىككە يە ەمەس تۇلعا – يرينا كوۆچەگوۆا تانىلۋدا. وسىعان بايلانىستى جۇرگىزىلىپ جاتقان تەرگەۋ جۇمىستارىنىڭ ادىلدىگى كۇمان تۋعىزادى.
سونداي-اق، «يمستالكون» اق-نىڭ بجزق قاراجاتىنا بايلانىستى ايلا ارەكەتى تۋرالى جۋرناليستەردىڭ ماقالاسى («ۆرەميا» گازەتى) ازاماتتىق سوتتا كەلىسىلگەن جوق. سوت شەشىمىنە سايكەس، كومپانيانىڭ لاۋازىمدى تۇلعالارىنا بايلانىستى ەشقانداي قىلمىستىق ءىس قوزعالماعان بولىپ شىقتى!
مىناداي قىزىق جاعداي ورىن العانىن كورەمىز: بىرىڭعاي جيناقتاۋ زەينەتاقى قورى بجزق سالىمشىلارىنىڭ قۇقىعىن قورعاۋ تالابىمەن قۇقىق قورعاۋ ورگاندارىنا جۇگىنگەن، تەرگەۋ جۇمىستارى ەكى جىلعا سوزىلۋدا، ال بۇل ماسەلەگە نازار اۋدارعان جۋرناليستەردى سوت ارقىلى ۇندەمەۋگە ماجبۇرلەيدى.
دەگەنمەن ولاردىڭ قويعان سۇراقتارىنا جاۋاپ بەرىلۋى ءتيىس. جانە نە سەبەپتى ءتورت ميلليارد تەڭگەنىڭ جويىلۋى تۋرالى تەرگەۋ ءىسىنىڭ سونشالىقتى سوزىلىپ جاتقانى تۇسىنىكسىز، بۇل ەكونوميكالىق تەكسەرىس دەپارتامەنتى قىزمەتكەرلەرىنىڭ سىلبىرلىعى ما، الدە باسقا دا ءبىر سۋبەكتيۆتى فاكتورلارعا بايلانىستى ما؟ مۇمكىن ءىس بجزق قاراجاتىنىڭ جوعالۋىنا تىكەلەي بايلانىستى تۇلعالاردى كەلىسىلگەن مەرزىمىنەن بوساتىپ، كەلەسى امنيستيانىڭ كۇتىلۋىنەن شەگەرەلىپ جاتقان بولار؟ وكىنىشكە قاراي، قوعام وسىنداي پىكىر دە بىلدىرۋدە.
وسىعان بايلانىستى، «اق جول» فراكتسياسى قارجى مينيسترلىگىنەن وسى ءىستىڭ بارىسى تۋرالى مىناداي اقپاراتتاردى سۇرادى: كىمدەرگە ايىپ تاعىلدى; ەگەر ايىپ ەشكىمگە تاعىلماسا، نە سەبەپتەن تاعىلمادى; «يمستالكون» ءتورت ميللياردتىق قارىزىن بىرىڭعاي جيناقتاۋ زەينەتاقى قورىنا قايتارا ما.
ايتا كەتەتىن جايت، «اق جولدىڭ» باستاماسىمەن 2017 جىلى بانكروتقا ۇشىراعان ءازىربايجان بانكىنىڭ باعالى قاعازدارىن ساتىپ الۋعا بجزق قارجىسى پايدانعانى تۋرالى الاياقتىق ءىس اشكەرە بولعان-تىن. بۇل وقيعادان سوڭ، پەرۋاشەۆتىڭ الەۋمەتتىك باسپانا سالۋ تۋرالى ۇسىنىستارى باق مەن الەۋمەتتىك جەلىلەردە بۇرمالانىپ، «اقپاراتتىق شابۋىل» جاسالعان بولاتىن.
«اق جول» پارتياسىنىڭ دەپۋتاتتارى سىبايلاس جەمقورلىققا قارسى كۇرەسكە، شەتەلگە زاڭسىز اقشا شىعارىلۋىنىڭ الدىن الۋعا، مەملەكەتتىك ورگاننىڭ باسقارۋىنداعى قاراجاتتىڭ ۇقىپتى پايدالانۋ بويىنشا جۇمىستارىن جالعاستىرۋدا.
«اق جول» پارتياسىنىڭ ءباسپاسوز قىزمەتى
