اقتاۋ گارنيزونىندا كومانديردىڭ قىزمەتتىك وكىلەتتىگىن اسىرا پايدالانعانى تۋرالى شۋ بولعان ءىس تاراپتاردىڭ تاتۋلاسۋىنا بايلانىستى توقتاتىلدى، دەپ حابارلايدى "ادىرنا" ۇلتتىق پورتالى قورعانىس مينيسترلىگىنىڭ ءباسپاسوز قىزمەتىنە سىلتەپ.
«2023 جىلدىڭ تامىز ايىندا اقتاۋ گارنيزونى اسكەري بولىمدەرىنىڭ بىرىندە ۆزۆود كومانديرىنىڭ مەرزىمدى اسكەري قىزمەتشىلەرگە قاتىستى قىزمەتتىك وكىلەتتىگىن اسىرا پايدالانۋ فاكتىسى انىقتالدى. تەرگەۋ شارالارى جۇرگىزىلدى. اقتوبە گارنيزونى اسكەري سوتىنىڭ شەشىمىمەن تاراپتاردىڭ تاتۋلاسۋى بويىنشا ءىس توقتاتىلدى»، - دەلىنگەن سەيسەنبى كۇنى تاراتقان حابارلامادا.
قورعانىس مينيسترلىگى «قازاقستان رەسپۋبليكاسىنىڭ اسكەري قىزمەتى جانە اسكەري قىزمەتشىلەرىنىڭ مارتەبەسى تۋرالى» زاڭنىڭ 26-بابىنىڭ 2-تارماعىنا سايكەس، «سوت ۇكىمى زاڭدى كۇشىنە ەنگەننەن كەيىن قۇقىق بۇزۋشىلىقتى جاساعان اسكەري قىزمەتشى تەرىس سەبەپتەر بويىنشا قازاقستان رەسپۋبليكاسىنىڭ قارۋلى كۇشتەرى قاتارىنان شىعارىلادى».
«قۇقىق بۇزۋشىلىقتىڭ الدىن الۋ، اسكەردەگى قارىم-قاتىناستاردىڭ جارعىلىق ەرەجەلەرىن بۇزۋدى انىقتاۋ جانە جولىن كەسۋ ماسەلەلەرى قارۋلى كۇشتەر باسشىلىعىنىڭ ەرەكشە باقىلاۋىندا. ولاردىڭ بارلىق كورىنىستەرى بويىنشا قۇقىقتىق جانە تارتىپتىك شارالار قولدانىلادى. ايتا كەتەرلىگى، قارۋلى كۇشتەردەگى مۇنداي بۇزۋشىلىقتار وقشاۋلانعان. بۇل رەتتە بىردە-ءبىر ءىس قاراۋسىز قالمايدى. جەدەل-ىزدەستىرۋ ءىس-شارالارىن جۇرگىزۋ بارىسىندا قىلمىستىق قۋدالاۋ ورگاندارىنا جان-جاقتى كومەك كورسەتىلۋدە»، - دەپ اتاپ ءوتتى قورعانىس مينيسترلىگى.
