تاشكەنتتە ناۋرىز مەرەكەسى قارساڭىندا ديپلوماتيا مەن مادەنيەتكە ارنالعان «وزبەكستاننىڭ وركەنيەتتىك الەۋەتى جۇمساق كۇشتىڭ باستى فاكتورى رەتىندە» اتتى مەديا-شارا ءوتتى، دەپ حابارلايدى «ادىرنا» ءتىلشىسى fergana.agency-گە سىلتەمە جاساپ.
ونى ەلدىڭ مادەني مۇراسىن زەرتتەۋ، ساقتاۋ جانە ناسيحاتتاۋ جونىندەگى دۇنيەجۇزىلىك قوعام مەن الەمدىك ەكونوميكا جانە ديپلوماتيا ۋنيۆەرسيتەتى ۇيىمداستىردى.
«ءبىزدىڭ ماقساتىمىز — ديپلوماتيا مەن مادەنيەت دەگەن ەكى كۇشتى بىرىكتىرۋ. الەمدىك قاۋىمداستىق كوپتەگەن زەرتتەۋ جۇمىسىن جۇرگىزدى جانە بۇل ءبىلىم بولاشاق ديپلوماتتاردىڭ قىزمەتىندە پايدالى بولۋى مۇمكىن. ءبىز كينەماتوگرافيا سالاسىندا پراكتيكالىق ىنتىماقتاستىقتى جوسپارلاۋدامىز. وزبەك كينوسىنىڭ باي مۇراسى بار. سوندىقتان جۇمساق كۇشتى ناسيحاتتاپ، شەت ەلدەرگە كينو ارقىلى اعارتۋشى زيالىلار، جاديدشىلەر تۋرالى ايتۋدى ماقسات ەتىپ وتىرمىز. الداعى ۋاقىتتا وزبەكستان كينەماتوگرافيا اگەنتتىگىمەن جانە كينوقورمەن بىرلەسىپ، حالىقارالىق كينوكلۋب ۇيىمداستىرماقپىز. ەلىمىزدە جۇمىس ىستەيتىن ديپلوماتتاردى شاقىرىپ، وزبەك كينوسىن شەتەلدە كورسەتەمىز»، – دەدى وزبەكستان سەناتى توراعاسىنىڭ ءبىرىنشى ورىنباسارى سادىق سافاەۆ.
