مەملەكەت باسشىسى قاسىم-جومارت توقاەۆ قازاقستان حالقىن ۇلىستىڭ ۇلى كۇنىمەن قۇتتىقتادى، دەپ حابارلايدى “ادىرنا” ۇلتتىق پورتالى اقوردا رەسمي سايتىنا سىلتەپ.
قۇتتىقتاۋ سوزىندە ول ناۋرىز مەيرامىنىڭ ماڭىزى جايلى ءسوز ەتتى:
“ۇلىستىڭ ۇلى كۇنى – ناۋرىز مەيرامى قۇتتى بولسىن! بۇل – ءبىزدىڭ اتا ءداستۇرىمىز. بۇگىن بارشامىز ءبىر ەل، ءبىر حالىق بولىپ ءتول جاڭا جىلىمىزدى قارسى الىپ جاتىرمىز. ءاز ناۋرىز – جاڭارۋ مەن جاڭعىرۋدىڭ سيمۆولى. بابالارىمىز ەجەلگى زاماننان بەرى ۇلىس كۇنىن جىل باسى رەتىندە اتاپ وتكەن. قازىر ءاز ناۋرىز كۇللى حالىققا ورتاق جالپىۇلتتىق مەرەكەگە اينالدى. ونى ۇلتىنا، دىنىنە قاراماستان بارشا جۇرتىمىز ەرەكشە كۇتەدى، بىرگە اتاپ وتەدى” دەدى پرەزيدەنت.
قۇتتىقتاۋ سوزىندە ول بيىل ناۋرىز مەيرامىنىڭ رامازان ايىمەن تۇسپا-تۇس كەلگەنىن تىلگە تيەك ەتتى:
“دانا حالقىمىز «جاقسى ءسوز – جارىم ىرىس» دەپ بەكەر ايتپاعان. جاڭا جىلدى جاقسى نيەتپەن، پايدالى ىسپەن باستاۋ – تالايدان قالىپتاسقان ءداستۇر. بۇل كۇنى قوناقجاي جۇرتىمىز اق داستارقان جايىپ، ءبىر-بىرىنە اقجارما تىلەكتەرىن ايتادى. بۇلاقتىڭ كوزىن اشىپ، تال ەگەدى، تازالىققا باسا ءمان بەرەدى. ناۋرىز مەرەكەسىندە حالقىمىزدىڭ اسىل قاسيەتتەرى مەن قۇندىلىقتارى تۇگەل كورىنىس تاپقان. بيىل ۇلىستىڭ ۇلى كۇنى رامازان ايىمەن تۇسپا-تۇس كەلىپ وتىر. قازاق جەرىندەگى ءدىن مەن ءداستۇردىڭ ۇيلەسىمى ءدال وسى كەزدە ايقىن كورىنەدى” دەپ اتاپ ءوتتتى قاسىم-جومارت كەمەلۇلى.
سونداي-اق، ناۋرىز مەيرامىنىڭ بيىل ناۋرىزناما رەتىندە 10 كۇنگە جالعاساتىنىن ايتتى:
“بيىلدان باستاپ ناۋرىز مەيرامى، ياعني ناۋرىزناما 10 كۇنگە جالعاسادى. بۇگىن ەلىمىز «ىنتىماق» كۇنىن اتاپ ءوتىپ جاتىر. بىرلىك پەن ىنتىماق – ەلىمىزدىڭ باستى قۇندىلىقتارىنىڭ ءبىرى. ءبىز جاناشىرلىق، تىلەۋلەستىك سياقتى اسىل قاسيەتتەردى دارىپتەۋىمىز كەرەك. ەلىمىزدىڭ بىرلىگى مەن تاتۋلىعى ءاردايىم بەكەم بولسا، ەلدىگىمىزدىڭ تۇعىرى ماڭگى بولادى. مەن بۇعان كامىل سەنەمىن” دەدى مەملەكەت باسشىسى.
