الماتى وبلىسىنا قاراستى ەسىك قالاسىنىڭ ماڭىنداعى بولەك اۋىلىندا ۇلكەن الماتى كانالىن كەسىپ وتەتىن كوپىردەن 46 جاستاعى ەر ادام قۇلاپ، قايتىس بولدى، دەپ حابارلايدى "ادىرنا" ۇلتتىق پورتالى "الماتى تەلەارناسىنىڭ اقپاراتىنا سىلتەپ.
مارقۇمنىڭ تۋىستارى ءمايىتتى قۇلاعان جەرىنەن الا الماي جاتقاندارىن ايتتى. ال جىل سايىن 3-4 ادام وسى كوپىردەن قۇلاپ قازا تابادى دەگەن جۇرت، "قىلكوپىر" اتالىپ كەتكەن بۇل وتكەلدىڭ قۇرىلىس كورمەگەنىنە 10 جىل ءوتتى دەيدى:
«قۇلاپ بارىپ، سىرعاناپ اناۋ تۇرعان بەتونعا باسىن جارىپ، ۇيەلەپ قالعان. ارتقا شىعۋعا مۇمكىندىك جوق. ءۇش قىزى، ءبىر ۇلى بار. ءبىر ءۇي ازاماتىنان، اسىراۋشىسىنان ايىرىلىپ وتىر. نارىنقولعا اكە-شەشەمىزدىڭ جانىنا جەرلەپ كەلدىك»، – دەدى مارقۇمنىڭ ءىنىسى ەلجاس ءنۇسىپوۆ.
بۇعان دەيىن دە تالاي ادام سۋعا كەتىپ، دەنەسىن ازەر تاۋىپتى.
«بىرىنشىدەن، بۇل كوپىر ەمەس، «گيدروسەرۆيس» جشس بالانسىندا تۇرعان ۇستىنەن سۋ وتەتىن قۇرىلعى. ال باسقا مەكەمەنىڭ بالانسىندا تۇرعاندىقتان، مەملەكەت تاراپىنان قاراجات ءبولىپ، كوپىر سالىپ بەرە المايمىز. دەمەۋشى تابىلعان جوق، ىزدەپ جاتىرمىز»، – دەدى ەڭبەكشىقازاق اۋدانى بولەك اۋىلدىق وكرۋگىنىڭ اكىمى اسىل يزيەۆ.
ازاماتتار الگى قاندى وتكەلگە قۇزىرلى ورگان وكىلدەرىن شاقىرىپ، ارىز جازدى. كوپ ۇزاماي اۋداندىق پروكۋراتۋراعا دا شاعىم تۇسىرمەك. تۇرعىنداردىڭ ايتۋىنشا، بۇل ماسەلەنىڭ قوزعالعانىنا ءبىرشاما جىل وتسە دە جابۋلى قازان، جابۋلى كۇيىندە قالىپ وتىر دەيدى.
ء"بارىمىزدىڭ كۇيەۋلەرىمىز نان تابامىن دەپ تۇزدە ءجۇر. ءبىز ۇيدە وتىرامىز. بالا-شاعامىزدى ساباققا جىبەرەردە قورقامىز. كوپىردەن وتەمىن دەپ، بىرنارسەگە دۋشار بولا ما ەكەن دەپ، ۇنەمى ۋايىمداپ وتىرامىز دەيدى" اۋىل تۇرعىندارىنىڭ ءبىرى.
پوسموترەت ەتۋ پۋبليكاتسيۋ ۆ Instagram
