بۇگىن، 18 ناۋرىزدا الماتىدا جەتى جاسار كارينا زاكۋراەۆانى ءولتىرۋ فاكتىسىنە نۇكتە قويىلدى. ونى ءولتىردى دەپ ايىپتالعان وگەي شەشەسى بالجان تۇرلىبەك كىنالى دەپ تانىلىپ، 20 جىلعا باس بوستاندىعىنان ايىرىلدى، دەپ حابارلايدى “ادىرنا” ۇلتتىق پورتالى.
ايەل قر قىلمىستىق كودەكسىنىڭ 99-بابىنىڭ 3-بولىگى («كامەلەتكە تولماعان ادامدى ءولتىرۋ») بويىنشا سوتتالدى.
“سوت قىلمىستىق ءىستى قاراپ، بالجان تۇرلىبەكتى كىنالى دەپ تانىپ، 20 جىلعا باس بوستاندىعىنان ايىردى. ول جازاسىن ورتاشا رەجيمدەگى كولونيادا وتەيتىن بولدى", - دەدى سوت وتىرىسىندا توراعالىق ەتۋشى ەرلان بولاتوۆ.
ەستەرىڭىزگە سالا كەتەيىك، 2022 جىلدان بەرى بالجان تۇرلىبەك ءبىرىنشى نەكەسىنەن كىشكەنتاي قىزى بار ازاماتپەن بىرگە تۇرادى. قىز بالا قۋىعى ۇستامايتىن اۋرۋمەن اۋىرعان.
2023 جىلدىڭ جازىندا سوتتالۋشى بالانىڭ بۇتىنا جىبەرىپ قويعان جاعىمسىز ءيىسىن سەزىپ، اشۋلانعان. ايىپتاۋشى تاراپتىڭ ايتۋىنشا، ول وگەي قىزىنىڭ موينىنان ۇستاپ، باسىنان ۇرا باستاعان، سودان كەيىن ونى جۋىناتىن بولمەگە سۇيرەپ اپارعان، سوندا ول باسىن ۆاننانىڭ شەتىنە قاتتى سوققان. بالا جەدەل جاردەم كەلگەنشە قايتىس بولعان.
