الاش وردانىڭ باتىس بولىگىندە ساياسي قىزمەتتەر مەن پەداگوگيكالىق قىزمەتتەردى اتقارعان قوعام قايراتكەرى تولەگەن يمانعازيەۆتىڭ 150 جىلدىعى، دەپ حابارلايدى "ادىرنا" ءتىلشىسى.
اعارتۋشى 1874 جىلدىڭ 16 ناۋرىزىندا سول كەزدەگى ورال وبلىسى ءىلبىشىن ۋەزى قالدىعايتى بولىسىنىڭ №2 اۋىلىندا دۇنيەگە كەلگەن.
ەڭبەك جولىن مۇعالىم بولىپ باستاعان تولەگەن يمانعازيەۆ 1904 جىلى جىمپيتى ۋەزى سونالى بولىسىنىڭ باسقارۋشىسى بولىپ سايلانادى. ال 1917 جىلعى اقپان توڭكەرىسىنەن كەيىن ءوزىن- ءوزى باسقارۋ جۇيەسىن قۇرۋ ىسىمەن شۇعىلدانادى. كەيىننەن باتىس الاش وردانىڭ وقۋ-ءبىلىم كوميتەتىنە مۇشە بولىپ قابىلدانادى.
الايدا قوعام قايراتكەرى 1937 جىلى بۇرىن بولىس بولعانى جانە الاشوردا ۇكىمەتىنە قىزمەت ەتكەنى ءۇشىن «ءپانيسلاميزمدى ناسيحاتتاۋشى، بەلسەندى الاشورداشىل» دەگەن ايىپپەن تۇتقىندالىپ، 1938 جىلى 15 اقپان كۇنى تۇندە ورال تۇرمەسىندە اتىلدى.
تولەگەن يمانعازيەۆ 1991 جىلعى 26 ساۋىردە تولىقتاي اقتالادى. سەبەبى باتىس الاشوردانىڭ باتىل اعارتۋشىسىنىڭ ۇلى حاسان تولەگەنوۆ 1961 جىلى 29 مامىردا باتىس قازاقستان قاۋىپسىزدىك كوميتەتىنە اكەسىنىڭ 1937 جىلى 2 اقپاندا تۇتقىندالعانىن، وسى ۋاقىتقا دەيىن حابار-وشارسىز كەتكەنىن جازىپ، ءوتىنىش بىلدىرگەن ەكەن. سوعان بايلانىستى تولەگەن يمانعازيەۆ ءىسى قايتا قارالادى.
