حالىق ءارتىسى روزا رىمباەۆا داۋىلدى جەلگە قاراماستان اقتاۋ قالاسىندا كونتسەرت بەردى، دەپ حابارلايدى «ادىرنا» ءتىلشىسى inaktau.kz-كە سىلتەمە جاساپ.
ەسترادا جۇلدىزىنىڭ كونتسەرتى 14 ناۋرىز كۇنى قالاداعى 15-شاعىن اۋدانداعى جاعالاۋدا وتەدى دەپ جوسپارلانعان. الايدا قۇتقارۋ قىزمەتى ءدال سول كۇنى ماڭعىستاۋ تۇرعىندارىنا سەكۋندىنا 20 مەترگە دەيىن جەتەتىن داۋىلدى جەل تۋرالى ەسكەرتۋ جىبەرگەن. ءانشى قولايسىز اۋا-رايىنا قاراماستان، كونتسەرتتى توقتاتپاي، كوپشىلىكتىڭ الدىندا ونەر كورسەتتى.
جەرگىلىكتى باسىلىمنىڭ جازۋىنشا، روزا رىمباەۆانىڭ ونەرىن تاماشالاۋعا 50-گە جۋىق كورەرمەن جينالعان.
«كونتسەرتتى كەيىنگە قالدىرعىمىز كەلگەن، بىراق روزا رىمباەۆا بۇعان ءۇزىلدى-كەسىلدى قارسى بولدى. ول اقتاۋ تۇرعىندارى اپتاپ ىستىقتا دا، ايازدى كۇنى دە، داۋىلدا دا، ءتىپتى سۋسىز قالعان كۇندەرى دە وسى قالانى تۇرعىزعانىن، سوندىقتان بۇل كونتسەرتتىڭ اقتاۋلىقتارعا دەگەن قۇرمەتى ەكەنىن ايتتى»،—دەپ ءتۇسىندىردى ۇيىمداستىرۋشىلار.
ايتا كەتەيىك، بۇعان دەيىن پاۆلودار قالاسىنىڭ اكىمدىگى روزا رىمباەۆا مەن قايرات نۇرتاستىڭ ناۋرىز مەرەكەسىنە وراي قالا تۇرعىندارىنىڭ الدىندا ونەر كورسەتكەنى ءۇشىن 10 ملن تەڭگە گونورار الاتىنىن مالىمدەگەن ەدى.
<
