“حابار” تەلەارناسىنىڭ باس پروديۋسەرى داستان شىمىرباي قىزمەتىنەن كەتپەك. بۇل تۋرالى ول ازاتتىق راديوسىنا ايتتى، دەپ حابارلايدى “ادىرنا” ۇلتتىق پورتالى.
ايتا كەتەيىك، 13 ناۋرىز مەملەكەتتىك "حابار" ارناسىنىڭ "بىراق..." توك-شوۋى ۇزاق ۋاقىت كۇيەۋىنەن ءزابىر كورگەن ايەلدى ەفيردە شاقىرىپ، كۇيەۋىنە قوسپاق بولعانى ءۇشىن سىنعا قالدى. رەزونانس تۋدىرعان باعدارلاما اشىلماي جاتىپ، بىردەن جابىلدى.
قر مادەنيەت جانە اقپارات ءمينيسترى ايدا بالاەۆا جەلىدەگى پاراقشاسىناسىنا "بىراق..." باعدارلاماسى تۋرالى رەسمي مالىمدەمە جاساپ، "توك-شوۋ جابىلادى" دەپ مالىمدەدى.
ال 14 ناۋرىزدا "حاباردىڭ" باس پروديۋسەرى داستان شىمىرباي ازاتتىققا وسى شۋعا بايلانىستى قىزمەتتەن كەتىپ جاتقانىن، "رەداكتسيا قاتەلەسكەنىن، جاۋاپكەرشىلىكتى موينىنا الاتىنىن" ايتتى.
«باعدارلامادا تيراندى ايەلىمەن تابىستىرۋ دەگەن ويىمىز بولمادى، تەك ەكى تاراپتى [حابارعا] شاقىرۋ دەگەن ويىمىز بولعان. ديرەكتور اكىمشىلىك جۇمىستارمەن اينالىسادى، مەن ەفيردەن وتەتىن حابارلاردىڭ مازمۇنىنا جاۋاپ بەرەمىن. كەشەگى جاعدايدان سوڭ باسشىلىققا بارىپ، جۇمىستان كەتەتىنىمدى ايتتىم. ارىز جازدىم. ەشكىم ماجبۇرلەگەن جوق. قازىر جۇمىستان كەتۋ قاعازىن تولتىرىپ ءجۇرمىن»، - دەدى ارنانىڭ باس پروديۋسەرى ازاتتىققا بەرگەن سۇحباتىندا.
ال باعدارلاما كەيىپكەرى "حابار" ارناسىن زاڭ جۇزىندە جاۋاپقا تارتقىسى كەلەدى.
