شري-لانكادا قازاقستاننىڭ ون التى جاستاعى ازاماتى قازا بولدى. قازىر مارقۇمنىڭ دەنەسىن ەلگە جەتكىزۋ ءۇشىن اۋە كومپانيامەن كەلىسسوز جۇرگىزىلىپ جاتىر. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ مالىمدەدى، دەپ حابارلايدى “ادىرنا” ۇلتتىق پورتالى.
قازاقستاننىڭ ۇندىستانداعى ەلشىلىگىنە كامەلەتكە تولماعان قازاقستاندىق شري-لانكا اۋرۋحاناسىندا اۋىر حالدە جاتىر دەگەن اقپارات تۇسكەن.
"اقپاراتتى تەكسەرە كەلە، 5 ناۋرىزدا ءجاسوسپىرىم سەرفينگپەن اينالىسىپ ءجۇرىپ، سۋعا باتىپ كەتكەنى انىقتالدى. ول بەس كۇن بويى جانساقتاۋ بولىمىندە جاتقان. دارىگەرلەر ونىڭ ءومىرى ءۇشىن كۇرەستى، بىراق، وكىنىشكە قاراي بالا قايتىس بولدى. قازىر ءبىزدىڭ كونسۋل بالانىڭ اكە-شەشەسىمەن بايلانىستا. بارلىق قۇجات راسىمدەلىپ جاتىر. مارقۇمنىڭ دەنەسىن قازاقستانعا جەتكىزۋ ءۇشىن ارنايى اۋە كومپانيامەن كەلىسسوز جۇرگىزىلىپ جاتىر", - دەدى سمادياروۆ اپتا سايىنعى بريفينگتە.
ونىڭ ايتۋىنشا، كوز جۇمعان قازاقستاندىق 16 جاستا. بىرنەشە جىل بويى اكە-شەشەسىمەن شري-لانكادا تۇرعان.
