قاراعاندىدا پوليتسەيلەر ينسۋلتتان كەيىن ەسىنەن تانعان جۇرگىزۋشىنى قۇتقاردى، دەپ حابارلايدى "ادىرنا" پورتالى قر ءىىم رەسمي ينتەرنەت-رەسۋرسىنا سىلتەپ.
«قيىلىستا ءبىز جول جيەگىندەگى بورديۋرعا شىعىپ كەتكەن كولىكتى كوردىك. وتالىپ تۇرعان كولىك بورديۋرعا ءىلىنىپ، ءبىر دوڭگەلەگى اينالىپ تۇردى. كولىكتىڭ ەسىگى قۇلىپتاۋلى ەدى. الدىڭعى جولاۋشى جاعىنداعى اينەكتى سىندىرىپ، سالونعا ءۇڭىلدىم. ارىپتەسىم ەكەۋمىز كولىك تىزگىنىندەگى ەر ادامدى سىرتقا الىپ شىقتىق. ونىڭ ينسۋلت العانى انىق بولدى، سەبەبى جۇرگىزۋشىنىڭ دەنەسى قۇرىسىپ، ال ءتىلى تىنىس الۋ جولىن بىتەپ تاستاپتى. ءبىز مۇنداي جاعدايلاردا قالاي ارەكەت ەتۋ كەرەكتىگىن بىلدىك جانە ەر ادامعا العاشقى مەديتسينالىق كومەك كورسەتتىك. ول ءبىزدىڭ كوز الدىمىزدا ەسىن جيا باستاعاندا، جەڭىل دەم الدى. وسىدان كەيىن ەر ادام مەديتسينالىق مەكەمەگە جەتكىزىلدى»، — دەيدى پاترۋل قىزمەتكەرى مۇقاجان اقجاركەن.
پوليتسەيمەن بىرگە تاعى ءبىر پاترۋل بەرىك كەڭەسوۆ بولدى. وقيعا 8 ناۋرىز كۇنى بولعان. قاراعاندىنىڭ 19-ىقشاماۋدانىنداعى قيىلىستاردىڭ بىرىندە ورىن العان توتەنشە جاعداي تۋرالى پوليتسياعا تاعى ءبىر كولىك جۇرگىزۋشىسى حابارلاعان.
دارىگەرلەردىڭ ايتۋىنشا، ەس-ءتۇسسىز جاتقان جۇرگىزۋشىنىڭ ءومىرى قىل ۇستىندە بولعان.
«بىرنەشە مينۋتقا كەشىكسە، ءبارى دە كەش بولار ەدى. قازىرگى ۋاقىتتا دارىگەرلەر ناۋقاستىڭ جاعدايىن تۇراقتى دەپ باعالاپ وتىر»، - دەلىنگەن حابارلامادا.
