اتىراۋدىڭ، دالىرەك ايتساق تەڭىزدىڭ مۇنايشىلارى كوتەرىلىپتى. بۇل جولعى ماسەلە تۇرمىستىق كيكىلجىڭ ەمەس. قازاق "اۋرۋ استان بولعاندا داۋ قارىنداستان" دەيدى.
كەشە عانا ارابتىڭ جىگىتىمەن سۋرەتكە تۇسكەن قازاق قىزىنىڭ سۋرەتى الەۋمەتتىك جەلىنى شارلاپ كەتكەن بولاتىن.
وسى سۋرەتتىڭ استىنا جەرگىلىكتى نامىستى جىگىتتەردىڭ اتىنان دەپ مالىمدەمە جاسالىپتى.
"اتىراۋ وبلىسى اكىمى نۇرلان نوعاەۆ مىرزا، وبلىس پروكۋرورى ح.داۋەشوۆ،پد باسشىسى ق.ۇمبەتقاليەۆ، اۋدان اكىمى ازامات بەكەت، اۋدان پروكۋرورى داۋرەن مەدەتبەكوۆ، ءىى ءبولىمى باسشىسى مارات تاعانيازوۆ، نۇر-وتان، جاستار وداعى، قىسقاسى، وسى اۋداندى بيلەپ وتىرعان بارلىقتارىڭ، مىنا نارسەگە مۇقيات نازار اۋدارىڭدار! ەلي وسى ۋاقىتقا شەيىن قانشا جازىقسىز قازاق جاستارىن نەگىزسىز جۇمىستان شىعارۋمەن جانە ورنىنا اقشامەن جاڭا جۇمىسشى الۋمەن شۇعىلدانىپ كەلگەن. جانە دە ول ارەكەتىن قاسىنداعى جاندايشاپ قازاقتاردىڭ قولىمەن جۇزەگە اسىرىپ وتىرعان. وسى قىلىعى ءۇشىن ەلي جۇمىستان بوساتىلسىن، جانە قارا ءمور باسىلىپ ەلدەن قۋىلسىن! انا سۋرەتى ءۇشىن ەل الدىنادا، سوت الدىندا كەشىرىم سۇراپ جاۋاپتالسىن! قازاق ۇلتىنان كەشىرىم سۇراپ بەينەتاسپا ءتۇسىرىپ الەۋمەتتىك جەلىگە جاريالاسىن! ەليگە قاتاڭ شارا قولدانىلسىن! دال وسى ۇلتارازدىق ماسەلەسىنە بايلانىستى تەڭىز تۇگەل كوتەرىلىپ كەتۋى ابدەن مۇمكىن! سەبەبى، بۇل ءۋاج نامىستان جارىلايىن دەپ ارەڭ شىداپ جۇرگەن قاندى ازاماتتاردىڭ شىرىلى جانە قاتاڭ ەسكەرتپەسى!". حاتتىڭ بۇل ءۇزىندىسى عانا.
جەرگىلىكتى بيلىك ماسەلەنىڭ الدىن الۋدىڭ ورنىنا بىرەۋدىڭ كەزەكتى قالجىڭى بولار دەپ ويلاعان شىعار. بۇگىن مىنە، سول قامسىزدىقتىڭ "جەمىسىن" جەپ جاتىر.
اراب جىگىتىن ۇرۋدان باستالعان نارازىلىق، جاپپاي شەت ەلدىك جۇمىسشىلاردى ۇرۋعا ۇلاسىپ كەتتى دەيدى. ەندى جۇمىسشىلار ساياسي تالاپتار قويىپ جاتقان كورىنەدى.
بىراق، داۋ قىزدان باستالعانمەن بۇنىڭ ارتىندا ۇلكەن الەۋمەتتىك تەڭسىزدىك جاتىر دەيدى تەڭىزدەن حابارلاسقان جىگىتتەر. قىمىزىمىزدى ۇرتتاتىپ، قىزىمىزعا قول سالدىرىپ قاراپ وتىرا المايمىز. وسى وقيعاعا كىنالى جۇمىسشىلار ەمەس، بيلىك. سوندىقتان دا جەرگىلىكتى اكىم-قارالار جاۋاپ بەرسىن دەدى رەداكتسيامىزعا حابارلاسقان ءادىل ەسىمدى جىگىت.
قازىر جارالانعاندارعا مەديتسينالىق كومەك كورسەتىلىپ، سىرتتان كەلگەن شەت ەلدىك جۇمىسشىلاردىڭ قاۋىپسىزدىگىن كۇشەيتىپ جاتىر. قانشا ادام جارالاندى، قايتىس بولعاندار بار ما دەگەن سۇراققا جاۋاپ ىزدەپ وتىرمىز.
"ادىرنا" ۇلتتىق پورتالى
