شەتەلدىكتەر اسىراپ العان قازاق بالاسى ءوز مۇڭىن ايتتى، دەپ حابارلايدى "ادىرنا" ءتىلشىسى «شەتەلدەگى قازاق بالالارى» باعدارلاماسىنا سىلتەپ.
16 جاستاعى اقىلبەك ەسىمدى قازاق بالاسىن يسپانيادا تۇراتىن وتباسى اسىراپ العان.
قازاقتىڭ اقىلبەگى قازىر لۋيس اتانعان. ونىڭ بار ارمانى بيولوگيالىق اتا-اناسىن تابۋ ەكەن.
"تۋعان اتا-انامدى تاۋىپ جاتسام، نەگە تاستاپ كەتكەنىن سۇرار ەدىم، سەبەبىن ايتسا ەكەن. مەنى نەگە تاستاپ كەتتىڭدەر؟ مەنى اسىراپ العان وتباسىما ريزامىن. بولاشاقتا كەلىپ تانىسقىلارىڭ كەلسە مەن سەندەرمەن كەزدەسۋگە دە دايىنمىن. كەزدەسكەندە «جاعدايلارىڭ قيىن بولدى ما؟ مەنىڭ باسقا تۋىستارىم، باۋىرلارىم، قارىنداستارىم بار ما؟» دەگەن سياقتى سۇراقتارىما جاۋاپ العىم كەلەدى، - دەدى لۋيس-اقىلبەك.
اقىلبەكتى تۋعان اتا-اناسى قاشان، قالاي جەتىمدەر ۇيىنە قالدىرعانىن ەشكىم دە بىلمەيدى. بىراق يسپاندىق ايەل اقىلبەكتى اقتاۋداعى جەتىمدەر ۇيىنەن اسىراپ العانىن ايتقان.
